Ўзбекистон Республикаси Ҳуқуқни муҳофаза қилиш академиясига АҚШ Ички хавфсизлик департаментининг Ички хавфсизлик соҳасидаги терговлар хизмати (HSI) халқаро операциялар бўйича минтақавий атташеси С. Мора бошчилигидаги делегация ташриф буюрди. Учрашувда Академиядан ҳуқуқни муҳофаза қилувчи органлар салоҳиятини ошириш бўйича хаб сифатида фойдаланиш ташаббуси ва уни амалга оширишнинг кейинги қадамлари муҳокама қилинди.

Меҳмонларга Академиянинг тузилмаси ва асосий фаолият йўналишлари, шунингдек, прокуратура ва тергов органлари ходимларини тайёрлаш, қайта тайёрлаш ҳамда малакасини ошириш тизими ҳақида маълумот берилди.

Томонлар ҳамкорликда амалга оширилаётган қўшма лойиҳаларни муҳокама қилди. Меҳмонлар уларни юқори баҳолади. Суҳбат давомида ҳуқуқни муҳофаза қилувчи органлар салоҳиятини оширишга қаратилган ташаббусни қўллаб-қувватлаш ва уни рўёбга чиқариш чоралари кўриб чиқилди.

Ташриф якунида томонлар ҳамкорликни янада ривожлантириш ва қўшма ташаббусларни қўллаб-қувватлашга тайёр эканликларини билдирди.