Ўзбекистон Республикаси Ҳуқуқни муҳофаза қилиш академияси БМТнинг 2030 йилгача бўлган давр учун кун тартибини қўллаб-қувватлаб, барқарор ривожланиш тамойилларини изчил жорий этмоқда. Атроф-муҳитни муҳофаза қилиш, энергия самарадорлиги ва ресурслардан масъулиятли фойдаланиш Академия фаолиятининг муҳим қисмига айланди.

Қайта тикланувчи энергиядан фойдаланиш борасида сезиларли натижаларга эришилди. 2026 йил январь–октябрь ойларида Академиянинг қуёш қурилмалари 71 612 кВт·соат электр энергияси ишлаб чиқарди. Бу 2025 йил давомидаги кўрсаткичдан уч баравар кўп бўлиб, шу даврда Академия истеъмол қилган электр энергиясининг қарийб 40 фоизини ташкил этди. Октябрь ойида электр энергияси истеъмоли август ойига нисбатан 26,2 фоизга камайди.

Академияда чиқиндиларни саралаб йиғиш ва қайта ишлаш тизими ҳам йўлга қўйилган. 2025 йилда ноорганик чиқиндиларнинг қарийб 90 фоизи қайта ишлашга йўналтирилди. Электр энергияси, газ ва сув истеъмоли, қуёш энергиясини ишлаб чиқариш ҳамда чиқиндилар ҳажми ҳақидаги маълумотлар ҳар ой ягона маълумотлар базасига киритилади. Бу ресурсларни аниқ ва шаффоф бошқариш имконини беради.

Ушбу ишлар БМТнинг Барқарор ривожланиш мақсадларига, жумладан, 6-мақсад – «Тоза сув ва санитария», 7-мақсад – «Арзон ва тоза энергия», 12-мақсад – «Масъулиятли истеъмол ва ишлаб чиқариш» ҳамда 13-мақсад – «Иқлим ўзгаришига қарши кураш» мақсадларига бевосита ҳисса қўшади. Академия натижалари UI GreenMetric ва THE Impact Rankings халқаро барқарор ривожланиш рейтингларида ҳам акс этмоқда.

Академия экологик масъулиятли амалиётларни янада ривожлантириб, мамлакат ва сайёранинг барқарор келажагига ҳисса қўшишда давом этади.