Ўзбекистон Республикаси Ҳуқуқни муҳофаза қилиш академиясида ихтисослаштирилган прокурорлар корпуси ходимлари учун жиноят ишларини судларда кўришда далиллар мақбуллигига оид жиноят-процессуал қонун нормаларини қўллаш ва суд ҳужжатлари ижросини ташкил этиш масалаларига бағишлаб ташкил этилган малака ошириш курси якунланди. 

Ушбу курс Бош прокурор томонидан ўқув жараёнини прокуратура органларининг касбий фаолияти билан узвий боғлаш бўйича белгиланган вазифалар ижроси доирасида ўтказилди. Унда туман (шаҳар) прокурорлари ва уларга тенглаштирилган прокурорларнинг ёрдамчилари, шунингдек вилоят прокуратуралари аппарат ходимлари иштирок этди.

Машғулотларни Бош прокуратуранинг тегишли таркибий бўлинмаларида фаолият юритувчи амалиётчи прокурорлар ва Академия профессор-ўқитувчилари олиб бордилар. Дарсларда далилларнинг мақбуллигини таъминлаш, уларни судда текширишда прокурорнинг процессуал ваколатларини амалга ошириш, илтимосномаларни асослаш ва суд музокарасида ўз позициясини далилларга таяниб баён этиш масалалари кўриб чиқилди. Шунингдек, суд ҳужжатлари ижроси устидан прокурор назоратини ташкил этиш, ижро кечикиши сабабларини аниқлаш ва қонунбузилишларни бартараф этиш чораларига эътибор қаратилди.

Суд жараёнини имитация қилиш машғулотларида тингловчилар далилларни тақдим этиш ва текшириш, процессуал позицияни асослаш ҳамда суд музокарасида нутқ сўзлаш бўйича амалий кўникмаларини мустаҳкамладилар.

Курс якунида комиссия тингловчиларнинг ўзлаштириш даражаси, билим ва кўникмалари ҳамда тайёрлаган лаборатория ишларини баҳолади.