Ўзбекистон Республикаси Ҳуқуқни муҳофаза қилиш академияси Илмий-инновацион тадқиқотларни мувофиқлаштириш ва илмий ходимларни тайёрлаш маркази бошлиғи Шайзаков Шодияр Ибрагимович Академия ҳузуридаги DSc.24/2025.27.12.Yu.01.01 рақамли Илмий кенгашда 12.00.04 – «Фуқаролик процессуал ҳуқуқи. Иқтисодий процессуал ҳуқуқи. Ҳакамлик жараёни ва медиация» ихтисослиги бўйича юридик фанлар доктори (DSc) илмий даражасини олиш учун диссертациясини ҳимоя қилди. Тадқиқот фуқаролик процессида суд ҳужжатларини юқори инстанцияда қайта кўришнинг назарий ва амалий муаммоларига бағишланган.

Ишда апелляция ва кассация босқичларида суд ҳужжатларини қайта кўриш тартибини такомиллаштириш, судларнинг ваколатларини аниқ белгилаш, янги далилларни ўрганиш ва прокурорнинг процессуал ҳуқуқларини таъминлашга доир илмий хулосалар ишлаб чиқилган. Шунингдек, фуқаролик суд ишларини юритишда сунъий интеллект технологияларидан фойдаланиш масалалари асослаб берилган.

Тадқиқот натижалари Фуқаролик процессуал кодексига ўзгартиш ва қўшимчалар киритиш, Олий суд Пленумининг қарорлари лойиҳаларини ишлаб чиқиш ҳамда фуқаролик одил судловида ягона амалиётни шакллантиришга қаратилган концепцияни тайёрлаш бўйича таклифларни қамраб олади.

Ҳимоя якунларига кўра, Шайзаков Шодияр Ибрагимовичнинг диссертация иши Илмий кенгаш томонидан юридик фанлар доктори (DSc) илмий даражасини бериш учун тавсия этилди.

Академия жамоаси Шодияр Ибрагимовични муваффақиятли ҳимоя билан табриклаб, илмий ва касбий фаолиятида муваффақиятлар тилайди.