Замонавий терговчи: касбий интеллект ва маънавий-ахлоқий фазилатлар
ProAcademy
(71) 202-04-96
info@proacademy.uz
Заиф кўрувчилар учун

Янгиликлар

“Et docere et discere servitute legis”

Замонавий терговчи: касбий интеллект ва маънавий-ахлоқий фазилатлар

Ўзбекистон Республикаси Ҳуқуқни муҳофаза қилиш академиясида Бош прокурорнинг биринчи ўринбосари Бахриддин Баходирович Валиев Академия битирувчи талабалари билан учрашди. Учрашув «Замонавий терговчига қўйиладиган талаблар: касбий интеллект ва маънавий-ахлоқий фазилатлар» мавзусига бағишланди.

Тадбирда Академия раҳбарияти, Бош прокуратуранинг соҳавий бошқармалари бошлиқлари, Академиянинг таркибий тузилмалари раҳбарлари ҳамда талабалар иштирок этди.

Ўзбекистон Республикаси Президентининг 2022 йил 28 ноябрдаги ПФ–257-сон Фармонида Академияда жиноятларни тергов қилиш соҳаси учун кадрлар тайёрлашни амалиёт билан узвий боғлаш назарда тутилган. Бош прокуратура раҳбарияти билан учрашув бўлажак терговчиларга касб талабларини бевосита муҳокама қилиш ва касбий дунёқарашини кенгайтириш имконини берди. Мулоқотда терговчининг касбий масъулияти, қонунийлик ва адолат тамойилларига риоя этиш масалаларига алоҳида эътибор қаратилди.

Б.Б.Валиев ўз маърузасида терговчининг жамият ва давлат ҳаётидаги ўрни, касбий масъулияти ҳамда мураккаб вазиятларда қонуний ва асослантирилган қарорлар қабул қилиш учун зарур билим ва тажриба ҳақида сўз юритди. У қонун устуворлигини таъминлаш, инсон ҳуқуқ ва эркинликларини ҳимоя қилиш ҳамда жиноятларни тергов қилиш самарадорлигини оширишга қаратилган ислоҳотларнинг аҳамиятига алоҳида тўхталди.

Жиноят содир этиш усулларининг мураккаблашуви ва рақамли технологияларнинг жадал ривожланиши терговчилар олдига янги вазифаларни қўймоқда. Бундай шароитда терговчи чуқур ҳуқуқий билим ва пухта амалий тайёргарликка эга бўлиши зарур. У мустақил, таҳлилий ва танқидий фикрлай олиши, далилларни ҳар томонлама баҳолаши, рақамли ахборот билан ишлаши ҳамда замонавий технологиялардан самарали фойдаланиши керак.

Маърузада ҳар бир процессуал қарор инсон тақдирига, унинг ҳуқуқ ва эркинликларига таъсир қилиши мумкинлиги боис қонунийликни таъминлаш, айбсизлик презумпциясига қатъий риоя этиш, далилларга холис баҳо бериш ва терговга ноқонуний таъсир ўтказилишига йўл қўймаслик касбий фаолиятнинг устувор талаблари сифатида қайд этилди.

Очиқ мулоқот чоғида талабалар билан келгусидаги хизматга тайёргарлик, касбий билимларни мунтазам ошириб бориш, назарий билимларни амалиётда қўллаш ҳамда замонавий тергов усулларини эгаллаш масалалари муҳокама қилинди.

Telegram Facebook