Замонавий тергов амалиёти учун илмий ечимлар
ProAcademy
(71) 202-04-96
info@proacademy.uz
Заиф кўрувчилар учун

Янгиликлар

“Et docere et discere servitute legis”

Замонавий тергов амалиёти учун илмий ечимлар

Ўзбекистон Республикаси Ҳуқуқни муҳофаза қилиш академияси вакиллари Беларусь Республикасининг Минск шаҳрида ташкил этилган «Тергов фаолияти: фан, таълим, амалиёт» мавзусидаги VI халқаро илмий-амалий конференцияда иштирок этди.

Беларусь Республикаси Тергов қўмитаси ҳамда унинг Малака ошириш ва қайта тайёрлаш институти ҳамкорлигида ташкил этилган анжуманда Ўзбекистон, Беларусь ва Россия давлатларининг ҳуқуқни муҳофаза қилувчи органлари, етакчи илмий-тадқиқот ва таълим муассасалари вакиллари қатнашдилар.

Конференция доирасида жиноятларни тергов қилиш соҳасидаги замонавий муаммолар, жиноят-процессуал фаолиятни такомиллаштириш ҳамда инновацион илмий-техник ечимларни ҳуқуқни муҳофаза қилиш амалиётига жорий этиш масалалари муҳокама қилинди.

Хусусан, жиноят ишларини юритишни рақамлаштириш, рақамли криминалистикани ривожлантириш, кибержиноятчиликка қарши курашиш, рақамли излардан исботлаш жараёнида фойдаланиш ва суд-экспертлик фаолиятини такомиллаштиришга алоҳида эътибор қаратилди.

Шунингдек, дастлабки терговни криминалистик жиҳатдан таъминлаш, далилий аҳамиятга эга ахборотни аниқлаш ва тадқиқ этишда замонавий технологияларни қўллаш, тергов фаолияти самарадорлигини ошириш ҳамда ҳуқуқни муҳофаза қилувчи органлар ходимларининг касбий тайёргарлигини такомиллаштириш масалалари юзасидан илмий муҳокамалар ўтказилди.

Академия вакилларининг халқаро конференцияда иштироки хорижий ихтисослаштирилган муассасалар билан илмий-амалий ҳамкорликни мустаҳкамлаш, илғор халқаро тажрибани ўрганиш ҳамда жиноятларни, шу жумладан, ахборот технологияларидан фойдаланган ҳолда содир этиладиган жиноятларни тергов қилишнинг илмий-методик асосларини такомиллаштиришга хизмат қилади.

Telegram Facebook