“Ижтимоий соҳада қонунлар ижроси устидан назоратни ташкил этишнинг долзарб масалалари” мавзусидаги вебинар

Бош прокуратура Академиясида жорий йилнинг 14 февраль куни Бош прокурор ўринбосари Э.Юлдашев раислигида Ўзбекистон Республикаси прокуратураси органларида ижтимоий қонунчилик ижроси устидан назорат йўналишида фаолият олиб борувчи туман (шаҳар) прокурорларининг ёрдамчилари, соҳавий ўринбосарлари, Қорақалпоғистон Республикаси, вилоятлар, Тошкент шаҳар, Ўзбекистон Республикаси Ҳарбий ва Транспорт прокуратураларнинг ушбу йўналишга масъул бўлимлари ходимлари иштирокида видеоконференцалоқа режимида республика семинар тренинги бўлиб ўтди.

Семинар тренингда Бандлик ва меҳнат муносабатлари вазири Ш.Кудбиев, вазир ўринбосари Б.Умирзақов, Соғлиқни сақлаш вазири ўринбосари И.Баситханова, Ўзбекистон ёшлар иттифоқи Марказий кенгаши раисининг биринчи ўринбосари, “Ёшлар – келажагимиз” жамғармасининг ижро этувчи директори Б.Бахромбеков ўзларининг маърузалари билан қатнашдилар.

Тадбирда мавжуд тизимли муаммо ва камчиликлар муҳокама этилди, иштирокчиларнинг асосий эътибори аҳоли бандлигини таъминлаш, янги иш ўринларини яратиш, фуқароларга малакали тиббий хизмат кўрсатиш борасида амалга оширилаётган ишларга қаратилди. Шу билан бирга, семинар давомида “Yoshlar – kelajagimiz” Давлат дастури ижроси бўйича олиб борилаётган чора-тадбирлар алоҳида таъкидлаб ўтилди.

Шунингдек, юқорида қайд этилган долзарб қонунчилик йўналишларида назорат тадбирларини ташкил этишда прокуратура органлари билан мутасадди вазирлик ва идоралар ўртасида яқиндан ҳамкорликни йўлга қўйиш юзасидан фикрлар алмашилди.

Семинар қизғин баҳс-мунозара руҳида ўтказилиб, иштирокчилар ўзларини қизиқтирган саволларга жавоб олдилар.

Иштирокчиларнинг фикрига кўра, бу каби тадбирлар келгусида ижтимоий соҳада мавжуд муаммоларни аниқлаш ва уларнинг ечимларини ишлаб чиқиш бўйича ўзига хос майдон бўлиб хизмат қилади.