Вояга етмаганларнинг ҳуқуқлари ва қонуний манфаатларини ҳимоя қилишга оид долзарб масалалар

Бош прокуратура Академиясида жорий йилнинг 20-26 февраль кунлари вояга етмаганлар ишлари бўйича туман (шаҳар) идоралараро комиссиялари масъул котиблари иштирокида “Вояга етмаганларнинг ҳуқуқлари ва қонуний манфаатларини ҳимоя қилишга оид долзарб масалалар” мавзусида малака ошириш курслари ўтказилди.

Мазкур курслар мобайнида асосий эътибор тингловчиларнинг назарий билимларини кучайтириш ва уларда амалий кўникмаларни шакллантиришга қаратилди. Шу мақсадда, тингловчилар иштирокида 2 та сайёр машғулот, 2 та семинар-тренинг ва 1 та давра суҳбати ўтказилди.

Хусусан, Тошкент шаҳар ИИББга қарашли вояга етмаганларга ижтимоий-ҳуқуқий ёрдам кўрсатиш транзит марказида жорий йилнинг 25 февраль куни “Вояга етмаганларга ижтимоий-ҳуқуқий ёрдам кўрсатиш борасидаги вазифалар” мавзусида давра суҳбати ўтказилди.

Давра суҳбати қизғин баҳс-мунозара руҳида ўтказилиб, тингловчилар ўзларини қизиқтирган саволларга жавоб олдилар ва вояга етмаганларнинг ҳуқуқлари ва қонуний манфаатларини ҳимоя қилишга қаратилган амалдаги қонунчилик ҳамда механизмларни такомиллаштириш бўйича ўз таклифларини билдирдилар.

Шунингдек, тингловчилар Зангиота туманидаги тарбия колониясида бўлишиб, вояга етмаган маҳкумларни сақлаш шароитлари, улар билан амалга оширилаётган тарбиявий ишлар аҳволи билан яқиндан танишдилар.

Шуни алоҳида таъкидлаш лозимки, малака ошириш курсларига “ЮНИСЕФ”нинг Ўзбекистондаги ваколатхонасидан маҳаллий ва халқаро экспертлар ҳам жалб этилди.

Чунончи, Бош прокуратура Академиясида жорий йилнинг 26 февраль куни халқаро эксперт С.Рыжкова иштирокида “Болалар ва оилани ижтимоий қўллаб-қувватлашда илғор хорижий тажриба ва халқаро стандартлар” мавзусида семинар-тренинг ўтказилиб, унда эксперт вояга етмаганларни ижтимоий қўллаб-қувватлаш соҳасида Молдова тажрибаси билан ўртоқлашди. Ўтказилган малака ошириш курслари якунида тингловчиларга сертификатлар топширилди.