Фуқаролик судларида ишлар кўрилишида прокурор ваколатини таъминлашга оид долзарб масалалар

Ўзбекистон Республикаси Бош прокуратурасида 2019 йилнинг 23 февраль куни Ўзбекистон Республикаси Олий суди, Ўзбекистон Республикаси Судьялар олий кенгаши ҳузуридаги Судьялар олий мактаби билан ҳамкорликда “Фуқаролик судларида ишлар кўрилишида прокурор ваколатини таъминлашга оид долзарб масалалар” мавзусида барча вилоятлар ва уларга тенглаштирилган прокуратураларнинг соҳа бўйича ходимлари хамда фуқаролик ишлари бўйича республика судьялари иштирокида вебинар шаклида Республика семинар-тренинги ўтказилди.

Тадбирда Бош прокуратура маҳкамасининг ходимлари, Ўзбекистон Республикаси Олий суди фуқаролик ишлари судлов ҳайъатининг судьялари,  Судьялар олий мактабининг ходимлари, Бош прокуратура Академиясининг профессор-ўқитувчилари ҳамда Академия тингловчилари, жойлардаги прокуратура идораларининг соҳа бўйича ходимлари ва фуқаролик ишлари бўйича вилоятлар, туманлараро (шаҳар) судларининг судьялари иштирок этдилар.

Семинар-тренингда фуқаролар ва юридик шахсларнинг бузилган ҳуқуқларини тиклаш ва қонуний манфаатларини ҳимоя қилишнинг самарали механизми бўлган фуқаролик судлов соҳасида одил судловни амалга оширишда процессуал қонунчилик талабларига риоя этган ҳолда моддий ҳуқуқ нормаларини бир хилда қўлланилишини таъминлаш масалалари борасидаги маърузалар бўйича мунозаралар ўтказилди.

Семинар-тренинг давомида судларда фуқаролик ишларини кўрилишида мавжуд бўлган муаммолар ва уларнинг ечими, конкрет тоифадаги ишларни кўрилишида ягона суд амалиётини шакллантириш масалалари ҳамда мазкур йўналишда прокурор ва суд идораларининг ҳамкорлигини янада кучайтириш истиқболлари хусусида фикр ва мулоҳазалар билдирилди.

Семинар якунида иштирокчилар қизиқтирган саволларга жавоб олдилар ва фикр алмашдилар.