Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Котибиятининг фаолиятини қўллаб-қувватланиши

2019 йилнинг 28 февраль - 1 март кунлари Ўзбекистон Республикаси Бош прокуратураси Академиясида Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Котибиятининг Бирлашган Миллатлар Ташкилотининг Наркотик моддалар ва жиноят бошқармаси (БМТ ГЖБ) вакиллари – Афғонистон ва қўшни давлатлар учун “Ҳуқуқий масалалар бўйича халқаро/ҳудудий ҳамкорлик” ҳудудий дастурининг 2 дастурости координатори Данило Камписи ва ушбу ташкилотнинг активларни қайтариш масалалари бўйича маслаҳатчиси Жилл Томас билан ишчи учрашуви амалга оширилди.

Маълумот учун: 2018 йилнинг 22-23 ноябрь кунлари Остона шаҳрида (Қозоғистон) ўтказилган Ғарбий ва Марказий Осиё давлатларининг активларни қайтариш бўйича норасмий тармоғини ташкил этиш юзасидан экспертларнинг тўртинчи минтақавий учрашуви якунларига асосан Ўзбекистон Республикаси Бош прокуратураси ARIN-WCA тармоғининг доимий Котибияти сифатида белгиланган. Котибиятнинг функцияларини амалга ошириш Ўзбекистон Республикаси Бош прокуратураси Академиясига юклатилган.

Учрашув давомида БМТ ГЖБ экспертлари Котибиятнинг иш фаолияти, ARIN-WCA тармоғининг ҳамда Котибиятнинг 2019 йилга мўлжалланган иш режалари билан танишди. Бундан ташқари, икки кун давомида экспертлар ва Котибият вакиллари томонидан мазкур тармоқнинг келгусидаги муҳим вазифалари ва Котибиятни ривожлантириш масалалари муҳокама қилинди.

Халқаро экспертлар ARIN-WCA тармоғи Котибияти томонидан қисқа муддат давомида амалга оширилган ишларни қайд этиб, ушбу Тармоқни келгусида қўллаб-қуввтлашга тайёр эканликларини билдиришди.