Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Бошқарув гуруҳининг биринчи учрашуви бўлиб ўтди

Ўзбекистон Республикаси Бош прокуратураси Академияси вакиллари 2019 йилнинг 13-14 март кунлари Қирғизистоннинг Бишкек шаҳрида Бирлашган Миллатлар Ташкилотининг Наркотик моддалар ва жиноят бошқармасининг кўмагида ташкиллаштирилган Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Бошқарув гуруҳининг биринчи учрашувида иштирок этишди.

Тармоқ иштирокчиларининг дастлабки келишувларига асосан Қозоғистон, Қирғизистон, Покистон, Туркманистон ва Ўзбекистон 2019-2020 йиллар даврига мазкур норасмий тармоқнинг Бошқарув гуруҳини ташкил қиладилар.

Учрашув қатнашчилари ва халқаро экспертлар тармоқ бошқарувини назорат қилишни амалга ошириш, стратегик ривожланиш ҳамда унда иштирок этишнинг механизмларини такомиллаштириш, веб-сайтни ишга тушириш, иштирокчиларнинг салоҳиятини ошириш учун ўқув курсларини ташкил қилиш, тармоқнинг умумий йиллик йиғилишини ўтказиш ва шу каби бошқа ташкилий масалаларни муҳокама қилишди.

ARIN-WCA Котибияти сифатида Бош прокуратура Академияси вакиллари Бошқарув гуруҳини тармоқни бошқариш борасида амалга оширилган ишлар, иштирок этувчи давлатлар томонидан боғланиш мумкин бўлган шахсларни аниқлаш, веб-сайтни ишлаб чиқиш, тегишли ҳужжатларни тайёрлаш ва кейинги режалар тўғрисида хабардор қилишди.

Бошқарув гуруҳининг биринчи учрашуви ишчан ва конструктив тарзда ўтказилиб, унинг якунларига кўра иштирокчилар фаол ҳамкорлик қилишга ҳамда ARIN-WCA тармоғини ривожлантиришга тайёр эканликларини билдиришди.