“Хавфсиз ҳудуд” мобил иловаси ҳуқуқбузарликлар профилактикасини янги даражага кўтаради

Жорий йилнинг 27 март куни пойтахт ИИБ матбуот марказида Бош прокуратура Академияси ташаббуси билан Тошкент шаҳар ички ишлар бошқармаси ҳамкорлигида БМТнинг ривожлантириш дастури ҳамда Буюк Британия элчихонасининг техник кўмагида ишлаб чиқилган янги “Хавфсиз ҳудуд” мобил иловасининг тақдимоти ўтказилди.

Фойдаланиш учун қулай ва оддий бўлган янги “Хавфсиз ҳудуд” мобил иловаси ёрдамида нафақат фуқароларнинг яшаш жойидаги профилактика инспекторларини, балки автоматик тарзда яқин атрофда жойлашган ички ишлар бўлими таянч пунктини ҳам аниқлаш мумкин бўлади.

Мазкур мобил илова 3 та (ўзбек, рус ва инглиз) тилда фаолият кўрсатади.

Мобил илова фойдаланувчилар учун профилактика инспекторлари ишларини баҳолаш ва ўзларининг изоҳларини қолдириш, яқин ҳудудларда жойлашган ички ишлар таянч пунктлари ёки бошқа тезкор хизматлар билан шошилинч алоқа ўрнатиш учун “SOS” тугмасидан фойдаланиш ҳамда шаҳар ИИБдаги расмий “Telegram bot”ларга мурожаатларни юбориш ва бошқа шу каби имкониятларни яратади.

Мобил илованинг асосий мақсади фуқаролар билан ички ишлар органлари ходимлари ўртасида ўзаро алоқа қилишнинг янги қулай шаклини ишлаб чиқишдан иборат.

Ҳозирги кунда мобил илова фақат Тошкент шаҳар ҳудудида синов тариқасида Android” платформасида фаолият кўрсатмоқда.

Янги “Хавфсиз ҳудуд” мобил иловасини “Google Play” орқали бепул юклаб олиш мумкин.