“Жиноят ишларида исбот қилиниши лозим бўлган ҳолатлар, далиллар мақбуллигига оид қонун нормаларининг қўлланилиши” мавзусидаги семинар

Жорий йилнинг 28 март куни Ўзбекистон Республикаси Бош прокуратурасида “Жиноят ишларида исбот қилиниши лозим бўлган ҳолатлар, далиллар мақбуллигига оид қонун нормаларининг қўлланилиши” мавзусида вебинар шаклида республика семинар-тренинги ўтказилди.

Вебинарда Бош прокуратура маҳкамасининг ходимлари, Ўзбекистон Республикаси Олий суди жиноят ишлари бўйича судлов ҳайъатининг судьялари,  Ўзбекистон Республикаси Судьялар олий кенгаши ҳузуридаги Судьялар олий мактабининг вакиллари, ИИВ ҳузуридаги Тергов департаменти терговчилари, Бош прокуратура Академиясининг профессор-ўқитувчилари ҳамда Академия тингловчилари, шунингдек жойлардаги прокуратура идораларининг соҳа бўйича ходимлари, жиноят ишлари бўйича Қорақалпоғистон, Тошкент шаҳар, вилоятлар, туман (шаҳар) судларининг судьялари, ИИБ тергов бошқармалари бўлим бошлиқлари иштирок этдилар.

Мазкур тадбир процессуал қонунчиликнинг далилларни тўплаш, текшириш ва баҳолашга  оид нормаларини тергов-суд амалиётида қўллашда мавжуд бўлган тизимли камчилик ва муаммоларни муҳокама қилиш, Жиноят-процессуал кодексига далиллар мақбуллигига доир киритилган сўнгги янгиликлар ва ўзгартишларни амалиётда тўғри ва бир хилда қўлланилишига эришиш борасида тушунтиришлар беришни ўз олдига мақсад қилиб қўйди.

Семинар давомида прокуратура ҳамда ички ишлар органларининг терговчилари, шунингдек судьялар томонидан амалиётда энг кўп йўл қўйилаётган процессуал хато ва камчиликлар муҳокама этилди.

Тадбир иштирокчиларининг маърузаларида конкрет мисоллар асосида далилларни тўплаш, текшириш ва баҳолашда йўл қўйилган камчиликлар хусусида тушунтиришлар бериб ўтилди.

 Тадбир иштирокчилари жойлардан аввалдан муаммоларни олган холда улар юзасидан муҳокамалар ўтказиб, тушунтиришлар бериш ташкиллаштирилганлигини алоҳида таъкидлаб ўтдилар.

Тадбир якунида амалдаги қонунчиликни такомиллаштириш борасида ҳам бир қатор таклифлар илгари сурилиб, иштирокчилар қизиқтирган саволларга жавоб олдилар ва фикр алмашдилар.