Мажбурий ижро бюроси ходимлари учун ўқув семинари

Бош прокуратура Академияси томонидан замонавий педагогик ва ахборот-коммуникацион технологиялардан фойдаланган ҳолда, электрон таълим соҳасида ишлаб чиқилган “ProAcademy” электрон портали орқали прокуратура органлари ходимларининг малака ошириш курслари тизимли равишда амалга ошириб келинмоқда.

Аралаш таълимнинг навбатдаги янги ўқув курсини ишга тушириш, шунингдек тингловчилар доирасини максимал даражада қамраб олиш, вақт ва ресурларни самарали тақсимлаш мақсадида жорий йилнинг 6 апрелида Бош прокуратура Академияси томонидан Мажбурий ижро бюроси билан ҳамкорликда Бюро ходимларининг малакасини мунтазам равишда ошириб боришга қаратилган комплекс тадбирлар доирасида видеоконференцалоқа шаклидаги ўқув семинар ташкил этилди.

Семинарда Бош прокуратура Академиясининг профессор-ўқитувчилари, Мажбурий ижро бюроси раҳбарияти ва марказий маҳкамаси ходимлари, Бюронинг барча вилоят ҳамда туман (шаҳар) суд ҳужжатлари ва бошқа органлар ҳужжатларини ижро этиш бўлимлари инспекторлари, давлат ижрочилари иштирок этдилар.

Ўқув семинарда иштирокчилар онлайн тарзда давлат ижрочилари учун масофавий таълим асосида малака ошириш курсларини ташкил этиш ҳамда мазкур ўқув машғулотларини ўтказиш юзасидан батафсил маълумотларга эга бўлдилар.

Тадбир иштирокчилари масофавий таълим тизимининг имкониятлари ва афзалликларини ҳар томонлама кўриб чиқдилар. Академия томонидан мазкур ўқув курсини тайёрлашда ҳуқуқни қўллаш амалиётида суд ҳужжатлари ва бошқа органлар ҳужжатларининг ижросини таъминлашда йўл қўйилаётган тизимли камчиликлар ва юзага келаётган муаммолар таҳлили натижаларига алоҳида эътибор қаратилганлиги қайд этилди.

Тадбир якунида ушбу масофавий таълим тизимининг самарали йўлга қўйилиши келгусида Бюро фаолиятида ижро иш юритиш соҳасидаги мавжуд муаммо ва камчиликларни ўз вақтида бартараф этиш ҳамда фуқароларнинг ҳуқуқ ва қонуний манфаатларини ҳимоя қилишда давлат ижрочиларининг касбий билим ва амалий кўникмаларини янада такомиллаштиришда муҳим омил бўлиб хизмат қилиши иштирокчилар томонидан алоҳида таъкидлаб ўтилди.