Суд-ҳуқуқ соҳасида ўқитиш ва тайёрлаш халқаро стипендия дастурида (IJET) Академия вакилларининг иштироки

Бош прокуратура Академияси Америка Қўшма Штатларида Суд-ҳуқуқ сохасида ўқитиш ва тайёрлаш бўйича стипендия дастурида (IJET) иштирок этиш ҳуқуқини берувчи xалқаро танловда ғолиб чиқди.

IJET дастури АҚШ Давлат Департаментининг Жиноят ишлари бўйича ёрдам кўрсатиш ва ҳамкорлик бошқармаси (INL/CAP) томонидан мувофиқлаштириладиган, Америка Юристлар Ассоциациясининг қонун устуворлиги ташаббуси (ABA/ROLI) билан амалга ошириладиган икки босқичли дастур ҳисобланади.

Дастурнинг биринчи босқичи илмий тадқиқотлар, АҚШга ташриф буюриш, ҳуқуқ ва тартиботни таъминлаш соҳасидаги фаолият билан танишиш ҳамда ислоҳотларнинг лойиҳа-режасини ишлаб чиқишни ўз ичига олади.

Иккинчи босқич АҚШлик экспертлар гуруҳининг Академия вакиллари томонидан ишлаб чиқилган “Ўзбекистонда профилактика ва жиноятчиликни олдини олиш соҳасидаги меxанизмларни такомиллаштириш” дастур лойиҳасига теxник кўмак кўрсатиш мақсадида Ўзбекистонга ташриф буюришидан иборат.

Дастурнинг биринчи босқичи бўйича Академия xодимлари Америка Қўшма Штатларида бир ойлик ўқишни муваффақиятли якунладилар. Ташриф чоғида суд, прокуратура, ҳуқуқни мухофаза қилиш органлари, пробация муассасалари, жамоат ташкилотлари ходимлари ва юридик кадрларни тайёрлаш муассасалари иштирокида давра суҳбатлари, семинар-тренинглар ва ишчи учрашувлар ташкил этилди.

Тренинг иштирокчилари АҚШнинг жамоат тартиби ва хавфсизлигини таъминлашга йўналтирилган суд-ҳуқуқ соҳасини ислоҳ қилиш бўйича миллий дастурлар ва ташаббусларнинг мазмуни, жиноят процессининг барча босқичларида адолатни қарор топтириш учун муқобил чораларни жорий қилиш, ихтисослаштирилган судларни ташкил этиш, вояга етмаганларлар учун қайта тикланувчи адолат (restorative justice) тамойиллари билан танишдилар.

Тренинг дастурининг натижалари бўйича жиноятлар содир этилишини эрта олдини олишнинг инновацион механизмларини жорий қилиш орқали жиноятчиликка қарши кураш тизимини такомиллаштириш, ҳодисаларни ҳисобга олиш ва кузатиб бориш учун ягона интеграциялашган ахборот тизимини жорий қилиш, аҳолини фаол жалб қилиш ва хабардор қилиш, жиноятчиликнинг олдини олишда иштирок этувчи шахсларнинг салохиятини ошириш каби таклифлар ишлаб чиқилди.

Бундан ташқари, Академия билан АҚШнинг суд-ҳуқуқ ва касбий тайёрлов институтлари ўртасида Тошкент шаҳрининг Чилонзор ва Шайхонтоҳур туманларида, Хоразм вилоятида, Қорақалпоғистон Республикасида жиноятларни олдини олиш бўйича намунавий лойихалар доирасида қонунчиликни такомиллаштириш соҳасида ҳамда ишлаб чиқилган таклифларни амалга ошириш, шунингдек илмий ва ўқув-услубий ишларни олиб бориш бўйича ҳамкорлик имкониятлари тўғрисида келишувларга эришилди.

Лойиҳани амалга оширилиши давом этмоқда.