Кембридж университети билан ҳамкорлик

Академия дунёнинг етакчи олий ўқув юртлари ва тадқиқот институтлари, жумладан Кембридж университети (Буюк Британия) билан ҳамкорлик қилади.

Кембридж университетининг 25 нафар вакилларидан иборат делегациясининг 3 дан 16 апрелгача бўлган ташрифи давомида бир қатор илмий ва амалий тадбирлар ташкил этилди.

Шу жумладан, жорий йилнинг 4 апрелида Кембридж университети профессори Сиддхарт Саксена (Siddharth Saxena) Бош прокуратура Академиясига ташриф буюрди.

Учрашув давомида Академиянинг Кембридж университети билан таълим ва илмий соҳаларда ўзаро ҳамкорлик шакллари бўйича келишувларга эришилди.

Жорий йилнинг 8-10 апрель кунлари Бухоро шаҳрида Кембридж университети (Буюк Британия) томонидан Бош прокуратура Академияси, Ўзбекистон Республикаси Фанлар Академияси, Жаҳон иқтисодиёти ва дипломатия университети билан ҳамкорликда «Research in Action» мавзусида семинар ўтказилди.

Семинар Марказий Осиё давлатлари тадқиқотчиларининг салоҳиятини мустаҳкамлаш, таълим соҳасида билим, инновация ва тажриба алмашиш, Британия таълим ва илмий-тадқиқот марказлари билан ҳамкорлик ўрнатишга қаратилган.

Семинар дастури секциявий мунозаралар доирасида фанлараро тадқиқотлар сифатини таъминлаш ва уларни рағбатлантириш, инновацион таълим технологияларини қўллаш, халқаро академик ҳамкорлик масалаларини, шунингдек илмий тадқиқот методологияси асослари бўйича тренингни ўз ичига қамраб олди.

Муҳокамаларда Кембридж университети, Кент университети, Озарбайжон дипломатик академияси, Тожик миллий университети, Бош прокуратура Академияси, Ўзбекистон Республикаси Фанлар Академияси, Жаҳон иқтисодиёти ва дипломатия университети, Тошкент шаҳридаги Халқаро Вестминстер университетининг академик доиралари вакиллари иштирок этди.

Тадбир иштирокчилари Барқарор ривожланиш мақсадларига эришиш учун минтақавий ёки халқаро муаммоларни ҳал қилишда ўз ҳиссаларини қўшиш мақсадида илмий салоҳиятни ошириш, Марказий Осиё давлатлари илмий-тадқиқот ва таълим муассасалари кучларини бирлаштириш заруратини қайд этиб ўтдилар.

Шунингдек, жорий йилнинг 13 апрель куни Бош прокуратура Академиясида Кембридж университети профессори С.Саксена, илмий ходимлари Р.Карл ва Т.Юнусовлар томонидан Академия докторантлари, мустақил изланувчи ва ўқитувчилари учун илмий тадқиқот методологиясига бағишланган семинар-тренинг бўлиб ўтди.

Семинар давомида тадқиқот ишини ташкил этиш ва методологияси, ҳодимларнинг ўзаро тажриба алмашиш механизмларини ривожлантириш, илмий-тадқиқот интеграцияси, узлуксиз касбий ривожланиш, илмий ва ҳуқуқий маълумотлар базасини таҳлил қилиш масалалари ёритилди.

Тадбир якунида ҳамкорликда тадқиқотлар ўтказиш, таълим ва илмий-тадқиқот соҳасида халқаро лойиҳалар ва дастурларда қатнашиш бўйича келишувга эришилди.