Халқаро экспертнинг Академия Лойиҳалар офиси салоҳиятини оширишдаги иштироки

Бош прокуратура Академияси фаолиятида лойиҳа бошқарувини жорий этиш борасидаги тадбирлар доирасида, USAIDнинг Ўзбекистондаги суд-ҳуқуқ соҳасидаги ислоҳотларни қўллаб-қувватлаш дастури кўмагида, персонални бошқариш ва маъмурий ҳуқуқ соҳалари мутахассиси, Массачусетс университети (АҚШ) профессори Малколм Руссел-Эйнхорн Академия ишига жалб этилди.

Эксперт томонидан Академия профессор-ўқитувчилари учун лойиҳа бошқарувини жорий этиш борасидаги ишлар билан танишиш, лойиҳа жамоаси билан индивидуал учрашувлар, лойиҳалар портфелини таҳлил қилиш, вақт, сифат ва ресурсларни бошқариш ва мониторинг қилиш тизимини такомиллаштириш бўйича тегишли тавсиялар, ҳамкорликдаги дастурлар ва методик ҳужжатлар ишлаб чиқиш, шунингдек, маъруза ва тренинглар ўтказиш каби тадбирларни ўз ичига олувчи дастур амалга оширилди.

Дастур доирасида Малколм Руссел-Эйнхорн билан Академия раҳбарияти ўртасида ўтказилган учрашувда прокуратура органлари тизимида лойиҳа бошқаруви фаолиятини амалга ошириш натижа ва истиқболлари, Академиянинг Массачусетс университети билан келгусидаги ҳамкорлиги масалалари муҳокама қилинди.

Шунингдек, халқаро эксперт Академия таркибий тармоқлари томонидан лойиҳаларнинг амалга оширилиши ҳамда Лойиҳалар офиси фаолияти билан танишди.

Академия Лойиҳалар офиси фаолиятини таҳлил қилиш натижаларига кўра, лойиҳа бошқарувини амалга ошириш, унинг сифатини мониторинг қилиш самарадорлигини янада оширишга қаратилган таклифлар ишлаб чиқилди.

Шунингдек, эксперт ташрифи доирасида Академия ходимлари учун ўзаро лойиҳаларни бошқаришнинг замонавий технологиялари ва дастурларини қўллаш, вазиятни таҳлил қилиш, вақтни бошқариш ва жамоа билан ишлаш кўникмаларини ривожлантиришга қаратилган “Прокуратура органлари фаолиятида лойиҳа бошқарувини жорий этиш истиқболлари” мавзусида давра суҳбати ташкил этилди. 

Ташриф чоғида халқаро эксперт Академиянинг лойиҳаларни ишлаб чиқиш ва амалга ошириш борасидаги ҳаракатларини юқори баҳолаб, бу борада келгусидаги ҳамкорлик алоқаларини янада кучайтиришга тайёр эканлигини таъкидлади. 

Дастур якунига кўра, Академиянинг лойиҳа бошқаруви йўналишидаги салоҳиятини янада ошириш юзасидан тавсиялар ишлаб чиқилиб, прокуратура органлари ходимлари учун ҳамкорликда ўқув дастурлари ва ўқув-методик материаллар тайёрлаш, тренинг ва семинарлар ўтказиш, лойиҳалар портфелини амалга ошириш орқали ўзаро ҳамкорликни янада кучайтириш борасида келишиб олинди.