Коррупцияга қарши курашиш бўйича истиқболли чора-тадбирлар муҳокамаси юзасидан учрашув ўтказилди

2019 йилнинг 25 апрель куни Бош прокуратура Академиясида ишлаб чиқилаётган 2019-2021 йилларга мўлжалланган Коррупцияга қарши курашиш бўйича давлат дастури лойиҳаси юзасидан халқаро экспертлар билан учрашув ташкил этилди.

Тадбирда БМТ Ривожланиш дастурининг коррупцияга қарши курашиш Глобал дастури бўйича маслаҳатчиси (Сингапур) А.Тимилсина, БМТ Ривожланиш дастурининг Истамбулдаги минтақавий маркази коррупцияга қарши курашиш сиёсати ва  давлат бошқаруви бўйича маслаҳатчиси И.Котетишвили, Франция ривожланиш агентлигининг комплаенс масалалари бўйича ҳуқуқий маслаҳатчиси Г.Мухаммедова каби коррупцияга қарши курашиш соҳасидаги етакчи халқаро экспертлар иштирок этди.

Шунингдек, учрашувда Давлат ҳокимияти ва бошқаруви органлари фаолиятининг очиқлигини таъминлаш фаолиятини мувофиқлаштириш ва мониторингини олиб бориш бўйича жамоатчилик кенгаши Раиси И.Абдуллаев, Ўзбекистондаги БМТ Ривожланиш дастури лойиҳасининг вакиллари, Коррупцияга қарши курашиш бўйича Республика идоралараро комиссияси аъзолари, Бош прокуратура Академияси раҳбарияти ва ходимлари қатнашди.

Муҳокама давомида экспертлар томонидан Давлат дастури лойиҳасини такомиллаштириш юзасидан, шу жумладан коррупцияга қарши чора-тадбирларнинг самарадорлигини ошириш, коррупцияга дучор бўлган соҳаларни аниқлаш механизмларини такомиллаштириш, давлат хизмати мақомини ҳуқуқий тартибга солиш, маиший коррупцияга барҳам бериш ва бошқалар бўйича тавсиялар берилди.

Учрашув натижалари бўйича иштирокчилар томонидан коррупцияга қарши курашиш бўйича истиқболли аниқ чора-тадбирлар ишлаб чиқилди.