«Transparency International»нинг миллий бўлинмалари билан учрашув

2019 йил 15 май куни Ўзбекистондаги БМТнинг Тараққиёт дастури Ваколатхонаси билан Коррупцияга қарши курашиш бўйича республика идоралараро комиссияси томонидан «Transparency International»нинг Қозоғистон, Россия ва Украинадаги миллий бўлинмалари вакиллари иштирокида учрашув ташкил этилди.

Учрашувда Бош прокуратура Академияси раҳбарияти, Республика идоралараро комиссиясининг эксперт гуруҳи аъзолари, Адлия ва Молия вазирликлари вакиллари, Академиянинг коррупцияга қарши курашиш илмий-таълим маркази ходимлари, шунингдек Савдо-саноат палатаси, Фуқаролик жамияти шаклланишини мониторинг қилиш мустақил институти ва «Ижтимоий фикр» жамоатчилик фикрини ўрганиш маркази вакиллари иштирок этишди.

Учрашув давомида Қозоғистоннинг Transparency International ижрочи директори Ольга Шиян, Россиянинг Transparency International бош директори ўринбосари, «Декларатор» лойиҳаси раҳбари Андрей Джвирблис ва Украинанинг Transparency International халқаро муносабатлар бўлими раҳбари Анастасия Козловцева иштирокчиларни «Коррупцияни қабул қилиш индекси» методологиясининг тузилиши, «Transparency International» миллий бўлинмаларининг вазифалари ва фаолиятининг асосий йўналишлари ҳамда амалга оширилаётган тадбирлар ва лойиҳалар билан таништиришди.

Шунингдек, учрашув доирасида «Transparency International» миллий бўлинмалари вакиллари Ўзбекистонда коррупцияга қарши курашиш соҳасида халқаро ташкилотлар билан ҳамкорликда амалга оширилаётган ислоҳотлар ва лойиҳалар ҳақида хабордор қилинди.

Учрашув «Transparency International» миллий бўлинмалари фаолиятининг асослари, уларнинг турли давлатлардаги иш тажрибалари билан яқиндан танишиш имконини берди.