Миллий судлов колледжи (АҚШ) экспертлари иштирокида масофавий таълим бўйича семинар ташкил этилди

20-26 май кунлари TETRA TECH DPK билан ҳамкорликда Академияда Миллий судлов колледжи (АҚШ) экспертлари Джозеф Сойер ҳамда Уильям Брансон иштирокида “Самарали масофавий таълимни ташкил этиш масалалари” мавзусида амалий семинар-тренинг бўлиб ўтди.

Семинар ўқув курслари контенти ва дизайнини ишлаб чиқиш, масофавий таълим жараёнида замонавий интерактив методларни қўллаш борасидаги илғор тажрибани ўрганиш орқали Академиянинг электрон ўқитиш салоҳиятини юксалтириш мақсадида ўтказилди.

Тренинг давомида асинхрон ва синхрон интерактив таълим бериш, масофавий ўқитиш платформаларининг самарадорлиги, электрон ўқитиш материалларини шакллантириш, катта ёшдагиларни ўқитиш назариялари ва услублари, ўқув циклининг вазифалари ва дизайнини ишлаб чиқиш, тушуниш ва эслаб қолиш даражасини оширишга йўналтирилган технологияларни қўллаш, самарали тақдимот, жумладан видео тақдимот яратиш учун зарур бўлган методика ва дастурий таъминотни танлаш масалалари атрофлича муҳокама қилинди.

Семинар дастуридан анъанавий ва онлайн дарсхоналарда масофавий таълим имтацияси муҳитидаги амалий машғулотлар ўрин олган бўлган бўлиб, унда иштирокчилар ҳам тингловчилар, ҳам модераторлар сифатида тажриба орттириш имконига эга бўлдилар.

Натижада Акдемия профессор-ўқитувчилари, Электрон таълим бўлими ва Ўқув жараёнини ташкил этиш ва назорат қилиш бўлими вакилларидан иборат 40 нафар ходим масофавий ўқитиш бўйича малака оширдилар.