Коррупция билан боғлиқ жиноятларни тергов қилиш масалаларига бағишланган семинар-тренингда иштирок

Академия ходимлари “Минтақавий мулоқот” ХНТ томонидан Тошкент вилоятининг Бўстонлиқ туманида 2019 йилнинг 28-30 май кунлари ташкил этилган “Коррупцияга оид мураккаб ишлар бўйича тергов ва суд ишларини юритиш” мавзусидаги семинар-тренингда иштирок этишди.   

Семинар-тренингда коррупция соҳасидаги халқаро ва хорижий экспертлар: Африка тараққиёт банкининг Коррупцияга қарши курашиш департаменти тергов ишлари бўйича директори Блэр Хасси (Кот-д’Ивуар), Justice Rapid Response ташкилотининг тергов ва гувоҳларни ҳимоя қилиш бўйича эксперти Стефани Хасси (Канада), ИҲРТ Коррупцияга қарши курашиш тармоғининг Истамбул ҳаракатлар режаси доирасида коррупцияга қарши курашиш бўйича маслаҳатчиси Андрей Кухарук (Украина), Латвия Бош прокуратурасининг коррупцияга қарши курашиш бўйича катта прокурори Марис Урбанс ва “Минтақавий мулоқот” ХНТ эксперти Горан Клеменчич (Словения) қатнашди.

Иштирокчилар томонидан коррупцияга қарши курашиш бўйича самарали чора-тадбирлар, коррупцияга оид жиноятларни аниқлаш манбалари, маълумот берувчи шахслар ва гувоҳларни ҳимоя қилишни ташкиллаштириш, молиявий терговни амалга ошириш, электрон далиллардан фойдаланиш, жиноий йўл билан орттирилган мулкларни музлатиш ва мусодара қилиш ҳамда бошқа масалалар муҳокама қилинди.

Тадбир миллий мутахассисларга коррупцияга қарши курашиш соҳасидаги халқаро стандартлар ва илғор хорижий тажриба билан танишиш имконини берди.