Россия Федерациясининг Бош прокуратурасига ташриф

Бош прокуратуранинг бир гуруҳ ходимлари, шу жумладан Академия ва Бош прокуратура ҳузуридаги Иқтисодий жиноятларга қарши курашиш Департаменти вакиллари жорий йилнинг 3-5 июнь кунлари Россия Федерациясининг Бош прокуратураси томонидан Москва шаҳрида ташкил этилган “Коррупция, уюшган жиноятчилик ва жиноий йўл билан топилган даромадларни легалаштиришга қарши курашиш тўғрисидаги қонунларнинг ижро этилиши устидан прокурор назорати” мавзусидаги семинарда иштирок этишди.

Семинар Ўзбекистон Республикаси ва Россия Федерациясининг Бош прокуратуралари ўртасидаги 2019-2020 йилларга мўлжалланган ҳамкорлик дастурини ижро қилиш мақсадида ўтказилди.

Семинар давомида коррупцияга қарши куршиш соҳасидаги ҳуқуқни қўллаш амалиёти, коррупцияга оид ҳуқуқбузарликларнинг олдини олишда прокуратура органларининг ўрни, коррупцияга оид жиноятларни аниқлаш ва тергов қилишда қонунларга риоя этилиши устидан прокурор назоратини ташкил этиш, жиноий йўл билан топилган даромадларни легаллаштиришни олдини олиш тизимига оид масалалар муҳокама қилинди.

Семинар иштирокчилари Ўзбекистонда коррупцияга қарши курашиш бўйича давлат сиёсати, шунингдек мамлакатда сўнгги йилларда амалга оширилаётган ислоҳотлар ҳақида хабардор қилинди.