Ўзбекистон давлат жаҳон тиллари университети билан ҳамкорлик тўғрисида меморандум имзоланди

2020 йил 20 февралда Бош прокуратура Академиясида Бош прокуратура Академияси ҳамда Ўзбекистон давлат жаҳон тиллари университети ўртасида ҳамкорлик тўғрисидаги меморандум имзоланишига бағишланган тадбир бўлиб ўтди.

Тадбирда Академия ва Жаҳон тиллари университети раҳбарияти ҳамда профессор-ўқитувчилари жамоаси иштирок этди.

Тадбир давомида томонлар ўртасида бўлиб ўтган конструктив мулоқотда ҳамкорлик истиқболлари муҳокама қилиниб, келгусидаги энг муҳим йўналишлари белгилаб олинди.

Таъкидлаш жоизки, Академия тил ўргатиш кафедраси томонидан Жаҳон тиллари университети билан ҳамкорликда Академия тингловчилари ва ходимларига хорижий тилларни ўқитиш, хусусан, юридик инглиз тилини ўқитишнинг инновацион методларини жорий этишга қаратилган қатор тадбирлар амалга ошириб келинмоқда.   

Шунингдек, Академия таянч докторантураси ва мустақил изланувчиликка номзодлар учун инглиз тили бўйича малака имтиҳонларига Университет профессор-ўқитувчилари вакиллари имтиҳон комиссияси раиси ҳамда аъзолари сифатида жалб қилиб келинмоқда. 

Меморандумнинг имзоланиши икки томонлама ҳамкорликнинг янада ривожланишига хизмат қилади. Хусусан, унда университетнинг етакчи мутахассисларини илмий тадқиқот ҳамда ўқув жараёнларига жалб қилишни кенгайтириш имкониятлари, Академия профессор-ўқитувчиларининг университет талабалари ҳуқуқий саводхонлигини оширишга қаратилган тадбирларни амалга ошириши ҳамда ҳамкорликда юридик инглиз тилини ўрганиш учун ўқув материаллари ва бошқа лойиҳаларни ишлаб чиқилиши кўзда тутилган.