Комплекс ижтимоий-иқтисодий ривожлантириш бўйича секторлар масъул котиблари фаолиятини самарали ташкил этиш бўйича ўқув курслари

Комплекс ижтимоий-иқтисодий ривожлантириш бўйича секторлар томонидан жойлардаги муаммоларни ўз вақтида аниқлаш ва ҳал қилиш, улар фаолиятини тўғри йўлга қўйиш, шунингдек, бу борада доимий ўқитишни йўлга қўйишни таъминлаш борасида Бош прокуратура раҳбарияти томонидан берилган топшириқлар ижросини таъминлаш мақсадида, жорий йилнинг 10-12 июнь кунлари Академияда Тошкент шаҳри туманлари секторлари масъул котиблари иштирокида “Секторлар фаолиятини тизимли ва самарали ташкил этиш” мавзусида қисқа муддатли ўқув курси ўтказилди.

Ўқув машғулотлари давомида секторлар фаолиятини тўғри ташкил этиш, аҳолининг долзарб муаммоларини ҳал қилиш учун мавжуд имкониятлардан самарали фойдаланиш, шунингдек, масъул котибларнинг бошқарувчилик ва ишчанлик хислатларини кучайтиришга алоҳида эътибор қаратилди.

Ўқитиш олдига қўйилган мақсадга эришиш учун машғулотларга Бош прокуратуранинг ижтимоий ва иқтисодий қонунчилик ижроси устидан назорат соҳаларига ихтисослашган бошқармалари ходимлари, шунингдек, Ўзбекистон Республикаси Марказий Банки, Ўзбекистон Республикаси Президентининг “Халқ қабулхоналари”, Фуқаролар ўзини ўзи бошқариш органлари фаолиятини мувофиқлаштириш бўйича Республика кенгаши, “Оила” илмий-амалий тадқиқот маркази, иқтисодиёт, инвестициялар ва ташқи савдо, бандлик ва меҳнат муносабатлари, ички ишлар, молия вазирликларининг малакали мутахассислари жалб этилди.

Ўқув машғулотлари доирасида тинговчилар Тошкент шаҳри бўйича намунали деб топилган Мирзо Улуғбек тумани 2-сектор штаби фаолияти билан танишдилар.

Ўқув курслари давомида таъкидланганидек, ўтказилган тренинглар тингловчиларда тизимли таҳлил қилиш, режалаштириш, маълумотларни йиғиш ва улар билан ишлаш, такрорланиб келаётган муаммоларни аниқлаш ва ҳал қилиш, жамоа бўлиб ишлаш, аҳоли билан мулоқот қилиш ва бошқарув қарорларини қабул қилиш борасидаги маҳорат ва кўникмаларини такомиллаштиришга хизмат қилди.

Ўқув машғулотлари якунида тингловчилар жойлардаги секторлар фаолиятини янада такомиллаштириш ва оптималлаштириш юзасидан асослантирилган таклиф ва мулоҳазалари баён этилган тақдимотларини намойиш қилдилар.