Фуқаролик судларида прокуратура органларининг роли

Бош прокуратура Академиясида 2019 йилнинг 27 май – 13 июнь кунлари “Фуқаролик судларида фуқаролар, корхона ва ташкилотларнинг ҳуқуқлари ва қонуний манфаатлари ҳимоя қилинишини таъминлашда прокуратура органларининг роли” мавзусида туман (шаҳар) прокурорлари ёрдамчилари иштирокида қисқа муддатли малака ошириш курслари ташкил этилди.

Ўқув дастури жойлардаги муаммолар, йўналишда мавжуд бўлган тизимли камчиликлар ҳамда алоҳида ўрганилиши талаб этилган долзарб масалалар доирасидан келиб чиққан ҳолда тузилди.

Ўқув машғулотлари Академия профессор-ўқитувчилари, шунигдек Бош прокуратура ва Олий суд фуқаролик ишлари бўйича судлов ҳайъатининг тажрибали ходимлари томонидан ўтказилди.

Машғулотлар давомида тингловчилар томонидан муҳокамага қўйилган алоҳида тоифадаги фуқаролик ишлари бўйича шаклланган суд-прокурор амалиётига оид бир қатор масалаларнинг ечими хусусида фикр юритилди.

Тингловчилар томонидан амалдаги қонунчиликка киритилган янгиликлар ҳамда уларни амалиётда қўллаш масалалари билан боғлиқ таҳлилий материаллар тайёрланиб, ушбу мустақил ишларнинг тақдимоти ўтказилди.

Шунингдек, ўқув машғулотлари давомида тингловчилар Ўзбекистон Республикаси Олий суди фуқаролик ишлари бўйича судлов ҳайъатининг фуқаролик ишларини назорат тартибида кўриш жараёнида иштирок этдилар.

Ўқув машғулотлари натижаси бўйича тингловчиларга тегишли намунадаги сертификатлар топширилди.