Афғонистон Ислом Республикаси Бош прокуратураси делегациясининг Академия фаолияти билан танишуви

Жорий йилнинг 17 июнь санасида Афғонистон Ислом Республикаси Бош прокурори Муҳаммад Фарид Ҳамиди бошчилигидаги делегация Ўзбекистон Республикаси Бош прокуратураси Академияси фаолияти билан танишиш учун ташриф буюрди.

Ташриф жараёнида меҳмонлар замонавий педагогик ва ахборот-коммуникация технологиялари, масофавий таълим, интерактив ҳамда муаммоли вазият методлари ва тренингларга асосланган Академия таълим жараёни билан яқиндан танишдилар.

Бундан ташқари, делегация вакиллари мультимедиа маркази, ахборот технологияларидан фойдаланиш ва Ахборот-коммуникация технологияларини жорий этиш ва ахборот хавфсизлигини таъминлаш бўлими, криминалистик полигон, воқеа жойини текшириш ва суд жараёни имитациясини амалга ошириш хоналари, Академия музейи ҳамда кутубхонаси фаолияти билан яқиндан танишдилар.

Делегация аъзолари фикрига кўра, Академия фаолиятининг ташкил этилиши ва унинг инновацион салоҳияти, зиммасига юклатилган вазифаларни ва мутлақо янги фаолият йўналишларини самарали амалга оширишга қодир бўлган, муносиб кадрлар таркибини шакллантиришни таъминлайди.

Ташриф якунида икки томонлама манфаатларни ифодалайдиган йўналишларда ўзаро ҳамкорлик алоқаларининг истиқболлари ҳақида келишувга эришилди.