Ғарбий ва Марказий Осиё давлатларининг активларни қайтариш бўйича тармоғининг (ARIN-WCA) халқаро тренинги ўтказилди

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғининг (ARIN-WCA) Котибияти функциясини амалга ошириши доирасида, ушбу тармоққа аъзо давлатларнинг мутасадди ходимлари ва вакилларини активларни қайтариш соҳасида ўқитиш ишларини олиб боради.

ARIN-WCA тармоғига аъзо давлатлар вакилларининг билим ва салоҳиятини ошириш мақсадида, 2019 йилнинг 17-21 июнь кунлари Бош прокуратура Академиясида Буюк Британиянинг AML Consulting Global ташкилоти экспертлари Жон Блейк ва Род Стоукс иштирокида “Молиявий суриштирув ва активларни таъқиб қилиш учун очиқ манбалардан фойдаланиш” мавзусида ўқув тренинги ўтказилди.

Бирлашган Миллатлар Ташкилотининг Наркотик моддалар ва жиноят бошқармаси (UNODC) билан ҳамкорликда Афғонистон ва унга қўшни давлатлар учун ҳудудий дастури доирасида ташкил қилинган мазкур тадбирда Афғонистон, Покистон, Тожикистон, Туркманистон, Ўзбекистон, Қозоғистон ва Қирғизистон давлатларининг прокуратура, ҳуқуқни муҳофаза қилувчи органлари, молиявий разведка тармоқлари ва бошқа тегишли идоралари вакиллари иштирок этишди.

Иштирокчилар ўқув машғулотлари давомида экспертлар томонидан берилган маълумотлар интернет орқали онлайн суриштирув ва қидирув ишларини олиб бориш, рақамли далилларни тўплаш ва уларга ишлов бериш, ижтимоий тармоқлар, чатлар ҳамда форумларда кенгайтирилган қидирувни амалга ошириш, рақамли тасвирларни тадқиқ қилиш, «Deep Web» ва аноним тармоқларда (TOR), шунингдек онлайн савдо майдончаларида маълумотларни излаш, криптовалюта ва блокчейнлар юзасидан билим ва амалий кўникмаларини оширишга хизмат қилишини таъкидлашди.

Ўқув тренинги амалий ва конструктив руҳда ўтказилиб, якуни бўйича иштирокчиларга сертификатлар тақдим қилинди.