Қозоғистон Республикаси Президенти ҳузуридаги ДБА Бошқарув институти директори билан учрашув

2019 йил 25 июнь куни Бош прокуратура Академиясида Қозоғистон Республикаси Президенти ҳузуридаги Давлат бошқарув Академияси Бошқарув институти директори Е.К.Абил билан учрашув бўлиб ўтди.

Учрашув давомида ўқув жараёнини ташкил этиш, ходимларнинг ўзаро тажриба алмашиш механизмларини ривожлантириш, лойиҳа бошқарувни жорий этиш ва ривожлантириш тажрибаси билан алмашиш, магистратурага қабул қилиш ва унда ўқитиш, ходимлар ва тингловчиларнинг стажировкасини ташкил этиш масалалари муҳокама қилинди.

Е.К.Абил Академия инфратузилмаси, шу жумладан мультимедиа маркази, криминалистик полигон, воқеа жойини текшириш ва суд жараёни имитациясини амалга ошириш хоналари, шунингдек Академия музейи билан яқиндан танишди.

Ўз навбатида Е.К.Абил Академия ходимларида Қозоғистон Республикаси Президенти ҳузуридаги Давлат бошқарув Академия магистратурасига грант асосида ўқишга кириш имконияти борлиги ҳақида маълумот берди.

Тадбир якунида томонлар ўзаро фойдали манфаатли муносабатларни йўлга қўйиш ҳамда илмий-таълим муассасалари ўртасида ўзаро тушуниш ва ҳамкорлик тўғрисида Меморандум имзолашга тайёр эканликларини таъкидлаб ўтишди.