Одил судловга оид халқаро стандартлар ва уларни амалга ошириш соҳасидаги дарслик нашр этилди

Коррупцияга қарши курашиш борасида мутахассисларни тайёрловчи муассасаларнинг илмий-таълим салоҳиятини ошириш мақсадида Бош прокуратура Академияси томонидан миллий, хорижий ва халқаро ҳамкорлар билан ҳамкорликда коррупцияга қарши курашишнинг турли жиҳатлари бўйича ихтисослашган адабиётлар тайёрлаш ишлари олиб борилмоқда.

Жумладан, Академия томонидан Ўзбекистон Республикаси Судьялар Олий кенгаши қошидаги Судьялар олий мактаби билан биргаликда «Одил судловга оид халқаро стандартлар ва уларнинг Ўзбекистон Республикасида жорий этилиши» мавзусидаги дарслик тайёрланди.

Ўзбекистон Республикаси Олий ва ўрта махсус таълим вазирлигининг Ўқув-услубий мувофиқлаштирувчи Кенгашининг 14.08.2020 йилдаги 418-234-сонли қарори билан дарслик нашрга тавсия этилди. 

Дарсликда одил судловга оид халқаро стандартларнинг асосий ёндашувлари очиб берилган, шунингдек тингловчилар томонидан уларни қўллаш бўйича кўникмаларни шакллантиришга қаратилган кенг материал тақдим этилган.