Бош прокуратура Академияси профессор-ўқитувчиларининг педагогик маҳоратини ошириш бўйича навбатдаги семинар-тренинг

Академия томонидан профессор-ўқитувчиларнинг педагогик маҳоратини ошириш, замонавий талабларга жавоб берадиган ва таълим сифатини юксалтиришга хизмат қиладиган инновацион таълим технологияларини ўқув жараёнига жорий этиш борасидаги ишлар изчил амалга ошириб келинмоқда.

Мазкур йўналишда навбатдаги “Таълим сифатини бошқариш” мавзусидаги семинар-тренинг Академия томонидан Тошкент давлат педагогика университети билан ҳамкорликда 2020 йил 28 февраль куни ўтказилди.

Тадбирда Тошкент давлат педагогика университети профессори, педагогика фанлари доктори Б.Ходжаев тренер сифатида иштирок этди.

Тренинг доирасида иштирокчилар таълим сифатини бошқариш борасида илғор хорижий тажриба, шунингдек касбий таълим ва кадрлар тайёрлаш учун Европа балл тизимининг таркибий қисми бўлган курсдан курсга ўтиш ва синов бирликларини тўплашнинг Европа тизими билан танишдилар.

Шу билан бирга Академия магистратурасида кредит-модуль тизими шароитида ўқув жараёнини ташкил этиш ва фаннинг ўзлаштирилганлигини баҳолаш тизимининг ўзига хос хусусиятлари атрофлича кўриб чиқилди, ўқитишнинг сифатини баҳолаш, таълимнинг халқаро стандартларини ҳамда академик рейтингни жорий этиш масалалари муҳокама қилинди.

Тренинг интерактив тарзда бўлиб ўтди, профессор Б.Ходжаев иштирокчиларни қизиқтирган саволларга батафсил жавоб берди.

Келгусида Тошкент давлат педагогика университети билан ҳамкорликда шу каби тадбирларни доимий равишида ўтказиб туриш ҳақида келишиб олинди.