Бош прокуратура Академияси магистратурасига 2020/2021 ўқув йили учун кириш имтиҳонлари якунланди

Ўзбекистон Республикаси Бош прокуратураси Академияси магистратурасига кириш имтиҳонлари ниҳоясига етди.

Кириш имтиҳонларининг сўнгги босқичи ҳисобланган суҳбат Академияда бўлиб ўтди. Унда Бош прокуратура ва Академия раҳбарияти ва ходимлари, республиканинг етакчи олий юридик таълим муассасалари вакилларидан иборат комиссия аъзолари масофадан туриб иштирок этишди.

Суҳбат жараёнида ташқи кузатувчи сифатида Академиянинг миллий ва хорижий ҳамкорлари иштирок этди.

Ёзма имтиҳонни ўтказиш, унинг натижаларини текшириш ҳамда суҳбат жараёнлари ошкора ва шаффоф тарзда ташкил этилди (суҳбат натижалари).

Кириш имтиҳонлари жараёнида номзодлар тўплаган балларни умумлаштириш якунларига кўра энг юқори натижаларга эришган 30 нафар номзод 2020/2021 ўқув йилида Академия магистратураси тингловчилари сафига тавсия этилди.

Ўзбекистон Республикаси Бош прокуратураси Академияси жамоаси Академия магистратурасига кириш имтиҳонларидан муваффақиятли ўтган номзодларни табриклаб, уларга илм-фан, таълим ва амалиёт чўққиларини эгаллашларида улкан зафарлар тилайди.

Эслатиб ўтамиз, тўлов-контракт асосида ўқишга қабул қилиш тавсия этилган номзодлар шартномада белгиланган тўлов суммасининг ярми (50%) ни 15 октябрга қадар тўлашлари лозим.

2020/2021 ўқув йили учун Бош прокуратура Академиясида тўлов-контракт миқдори 9 537 528 сўм этиб белгиланган.