Вилоят прокуратураларининг матбуот хизмати ходимлари учун малака ошириш курсларини ташкил этиш ҳақида

Бош прокуратура Академияси жорий йилнинг 24-29 июнь кунлари вилоят прокуратуралари ва уларга тенглаштирилган прокуратураларнинг жамоатчилик билан алоқалар ва ҳуқуқий ахборот бўйича катта ёрдамчилари учун ташкил этилган малака ошириш курсларини ўтказди.

Мақсад – ҳаққоний ва холис ахборотни тезкорлик билан аҳолига етказишнинг зарур инструментларини қўллай билиш.

Ўқув курслари орқали тингловчиларда қуйидаги компетенциялар шакллантирилди: интернет материаллари билан ишлаш жараёнида веб-платформаларнинг ўзига хос жиҳатларини билиш; онлайн материалларни тайёрлашда аудитория эҳтиёжлари ва медиа одатларини инобатга олиш; ташкилотнинг медиа имиджини ривожлантириш; вербал ва новербал коммуникацияни ўрганиш.

Ўқув курсларига Светлана Артикова – Олий Мажлис Сенати раисининг ўринбосари, Илҳом Абдуллаев – Олий Мажлис Қонунчилик палатаси қўмитаси раиси, Шерзод Қудратхўжаев – халқаро пресс-клуб раиси, Журналистика ва оммавий коммуникациялар университети ректори, Муаттара Асқарова – Ўзбекистонда хизмат кўрсатган журналист, Расул Кушербаев – Олий Мажлис Қонунчилик палатаси депутати жалб қилиндилар.

Шунингдек, журналистика соҳасидаги таниқли тренерлар – Беруний Алимов, Гулмира Шукурова, Нозима Муратова, Гулнора Нишонова ва Бош прокуратура Академияси ўқитувчилари шулар жумласидандир.

Машғулотлар сўнгида тингловчиларга сертификатлар топширилди.