Бош прокуратура Академияси делегациясининг РХХваДХА СБИ фаолияти билан танишуви

Бош прокуратура Академияси томонидан қўшма илмий тадқиқотлар ўтказиш, тажриба алмашиш, хорижий мутахассисларни жалб қилиш, педагог ва илмий ходимлар ҳамда тингловчиларнинг хорижий таълим муассасаларида стажировкаларини ташкил этиш соҳасида халқаро хамкорликни мустаҳкамлаш бўйича тизимли ишлар амалга оширилмоқда.

Шу боис, ҳамкорлик битими доирасида Бош прокуратура Академиясининг 12 нафар ходим ва тингловчиларидан иборат гуруҳ Россия Федерацияси Президенти ҳузуридаги Россия халқ хўжалиги ва давлат хизмати академияси филиали – Сибирь бошқарув институти фаолияти билан танишиш учун 8 кунлик ташрифни амалга оширди.

Ташриф давомида масофавий таълимни жорий этиш, инновацион педагогик технологияларни қўллаган ҳолда ўқув жараёнини ташкил этиш, назорат тизими, фан ва амалиётдаги долзарб муаммолар бўйича қўшма фундаментал ва амалий илмий тадқиқотларни режалаштириш, ташкил этиш ва ўтказиш бўйича тадбирларни амалга ошириш масалалари муҳокама қилинди.

Ташриф дастуридан икки томонлама учрашувлар, давра суҳбатлари ва бошқа тадбирлар ўрин олган. Хусусан, Новосибирск области прокуратура органлари ходимлари, Новосибирск области губернаторининг биринчи ўринбосари ва бошқалар билан учрашувлар ташкил этилди.

Ташриф доирасида “Коррупцияга қарши курашиш соҳасидаги давлат сиёсати” мавзусида ўқув курси ўтказилиб, якуни бўйича иштирокчиларга малака оширилганлиги тўғрисида гувоҳномалар топширилди.

Мазкур ташриф таълим ва илмий-тадқиқот фаолияти соҳасидаги ҳамкорлик тўғрисидаги битимнинг самарали амалга оширилишига хизмат қилади.