Қонунийликни таъминлаш ва ҳуқуқбузарликларнинг олдини олишда маҳалланинг ролини ошириш

Фуқароларнинг ўзини ўзи бошқариш органлари билан ўзаро ҳамкорликни мустаҳкамлаш борасида белгиланган вазифаларни ижро этиш, шунингдек, долзарб муаммоларни аниқлаш ва ҳал этишга доир фаолият самарадорлигини ошириш мақсадида жорий йилнинг 24 – ­29 июнь кунлари Академия томонидан Тошкент шаҳрининг Учтепа туманидаги фуқаролар йиғини раислари ҳамда котиблари иштирокида “Қонунийликни таъминлаш ва ҳуқуқбузарликларнинг олдини олишда маҳалланинг ўрни” мавзусида сайёр ўқув курси ташкил этилди.

Мазкур ўқув курсининг мақсади ҳудудларда қонунийликни таъминлаш ва ҳуқуқбузарликлар профилактикасини самарали ташкил этишда жамоатчилик, айниқса, маҳалланинг ролини оширишдан иборат.

Ўқув курси давомида тингловчиларда жисмоний ва юридик шахсларнинг мурожаатларини кўриб чиқиш ишларини самарали ташкил этиш, фуқаролар қабулини тўғри амалга ошириш, ҳуқуқбузарликлар профилактикаси соҳасида ҳуқуқни муҳофаза қилувчи органлар билан самарали ҳамкорликни йўлга қўйиш, муаммони тўғри аниқлаш ва ўз вақтида бартараф этиш, вазиятларни тизимли таҳлил қилиш, низоли вазиятларда кечиктирмай қарор қабул қилишга доир билим ва кўникмаларни шакллантиришга алоҳида эътибор қаратилди.

Машғулотлар ўқитишнинг интерфаол методларини қўллаган ҳолда тренинг ва маърузалар шаклида, шунингдек, Бош прокуратуранинг тегишли тармоқлари ва бошқа идораларнинг мутахассисларини жалб қилган ҳолда ташкил этилди.

Ўқув курси якунида, тингловчилар машғулотларнинг самарадорлиги юзасидан фикр билдириб, тренингда орттирилган билим ва кўникмалар ҳудуддаги ижтимоий-иқтисодий ривожланиш ва барқарорликни таъминлаш, шунингдек, аҳолининг долзарб муаммоларини ҳал этишга доир чора-тадбирларни амалга оширишда асқотишини маълум қилишди.