Халқаро илмий-амалий онлайн конференция бўйича ахборот

Ўзбекистон Республикаси Бош прокуратурасининг Академияси “Аҳоли миграциясида рақамли визалар платформасини ишлаб чиқиш” инновацион лойиҳани амалга ошириш, шунингдек миграция соҳасидаги давлат бошқарувининг стратегик жиҳатларини аниқлаш, устувор хусусиятларини тадқиқ этиш, миграцион қонунчилик ва ташкилий-институционал механизмларнинг ишлаш ҳолатини ўрганиш асосида мавжуд муаммо ва камчиликларнинг бартараф этилиши, миграция жараёнларини самарали тартибга солиш тизимини такомиллаштиришга қаратилган илмий асосланган таклиф ва тавсияларни ишлаб чиқиш мақсадида 2020 йил 18 декабрь куни бўлиб ўтадиган Мигрантлар халқаро кунига бағишланган “Мамлакатимизда миграция соҳасидаги давлат бошқарувининг долзарб масалалари” мавзусидаги халқаро илмий-амалий онлайн конференцияга таклиф этади.

Мазкур тадбирда миллий ва чет эл олий таълим ва илмий тадқиқот институтлари экспертлари, қонун чиқарувчи ҳокимият вакиллари, суд ва ҳуқуқни муҳофаза қилувчи органлар ходимлари, миграция муносабатларини тартибга солиш билан шуғулланувчи идоралар ходимлари, фуқаролик жамияти институтлари вакиллари, миграция муаммолари билан шуғулланаётган тадқиқотчилар қатнашишлари мумкин.

Ҳуқуқ, иқтисод, сиёсат, социология каби фанларнинг предмети бўлган миграция масаласи комплекс хусусиятга эга эканлигини инобатга олиб, мазкур мавзу билан илмий тадқиқот олиб бораётган барча изланувчиларни илмий мақола ва тезислари билан иштирок этишга таклиф қиламиз.

Халқаро конференция иши ўзбек, рус ва инглиз тилларида қуйидаги шўъбаларда олиб борилади:

1. Миграция масаласининг ҳуқуқий муаммолари;

2. Миграция жараёнларининг иқтисодиётдаги ўрни ва аҳамияти;

3. Миграциянинг сиёсий жиҳатлари ва хусусиятлари;

4. Миграциянинг ижтимоий-маданий ҳаётга таъсири;

5. Миграция ва соҳалараро тадқиқотларнинг истиқболлари.

Конференция якунлари бўйича тўплам нашр этиш кўзда тутилган. Мазкур тўпламда илмий мақола ва тезислар билан иштирок этиш учун қуйидаги келтирилган талабларга мувофиқ расмийлаштирилган илмий мақола ва тезисларни ўзбек, рус ёки инглиз тилларидан бирида жорий йилнинг
20 ноябрига қадар 23042020@proacademy.uz электрон манзили орқали юборишингиз сўралади.

Мақола ва тезисларнинг асосий шарти илова қилинади.

Тўпламда нашр этиладиган мақолалар диссертациялар асосий натижаларини чоп этишга тавсия этилган илмий нашрлар рўйхатига киритилган хорижий илмий нашрларда чоп этилган илмий мақолаларга тенглаштирилади

МАҚОЛАГА ҚЎЙИЛАДИГАН 10 АСОСИЙ ТАЛАБ:

1. Мақолада конференция секцияларидаги мавзулардан бири бўйича тизимли таҳлил ҳамда аниқ янги назарий ва амалий таклифлар акс этиши;

2. Матн такрорларсиз, мантиқий изчил, баён қилинган фикрлар аниқ, қисқа ва лўнда бўлиши;

3. Келтирилаётган маълумотлар ишончли ва тўғри бўлиши;

4. Мақолага тўпламда нашр қилиш мумкинлиги ҳақида шу соҳадаги етакчи олим ёки мутахассиснинг ёҳуд муаллиф, тадқиқотчи фаолият юритадиган муассаса ёки унинг таркибий тузилмаси (кафедра) раҳбари тақризи;

5. Матн ўзбек, рус ёки инглиз тилларидан бирида тақдим этилиши;

6. Матн компьютерда Microsoft Word дастурининг Times New Roman шрифтида 14 катталикда 1,5 интервалда А4 форматли стандарт оқ қоғознинг бир томонида ёзилиши, электрон нусхада тақдим этилиши ҳамда матннинг чап қисми 3 см, ўнг қисми 1,5 см, тепа ва пастки қисмлари 2 см бўлиши;

7. Мақолада илмий баҳс-мунозара, иқтибосларнинг мавжуд бўлиши; иқтибослар 12 катталикдаги шрифтда 1,0 интервалда ёзилиши (иқтибослар тегишли бетнинг пастки қисмида келтирилиши);

8. Мақоланинг ҳажми 6 бетдан 12 бетгача, тезиснинг ҳажми 3-4 бет бўлиши;

9. Мақоланинг биринчи саҳифасида муаллифнинг исм-шарифи, илмий даражаси ва унвони, иш жойи ва лавозими, яшаш ва хизмат манзили, телефон рақамлари ёзилиши;

10. Ўзбек, рус ва инглиз тилидаги муаллифнинг исм-шарифи, илмий даражаси ва унвони (агар мавжуд бўлса), иш жойи ва лавозими, мақоланинг номи, қисқача аннотация ҳамда таянч сўзлар бўлиши шарт.

ИЗОҲ: Мақолалар электрон шаклда қабул қилинади. Мақоланинг конференция қайси секциясига тааллуқли эканлигини мақола сарлавҳасида қўшимча кўрсатиб ўтиш лозим. Ушбу талабларга мувофиқ келмайдиган материаллар нашрга қабул қилинмайди ва муаллифга қайтарилмайди.

Батафсил маълумотлар учун Ўзбекистон Республикаси Бош прокуратураси Академиясининг расмий сайти www.proacademy.uz ни кузатиб боринг.