Активларни қайтариш бўйича ҳудудий тармоқларнинг котибиятлари вакилларининг учрашувида иштирок этилди

Ўзбекистон Республикаси Бош прокуратураси Академияси вакиллари Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Котибиятининг вазифаларини амалга оширишлари доирасида Европанинг CARIN тармоғи ҳамда Европолнинг жиноий активлар бўйича бюроси томонидан Нидерландиянинг Гаага шаҳрида ташкиллаштирилган активларни қайтариш бўйича норасмий тармоқларнинг (ARIN) котибиятлари ва раислик қилувчи давлатлари вакилларининг учрашувида иштирок этишди.

Европолнинг бош биносида ўтказилган мазкур учрашувда Европа (CARIN), Осиё ва Тинч океани (ARIN-AP), Кариб ҳавзаси (ARIN-CARIB), Шарқий Африка (ARIN-EA), Ғарбий Африка (ARIN-WA), Жанубий Африка (ARINSA), Лотин Америкаси (RRAG), Ғарбий ва Марказий Осиё (ARIN-WCA) минтақаларида ҳозирги кунда фаолият юритаётган тармоқларнинг котибиятлари ва раислик қилувчи давлатлари вакиллари, Европол, Еврокомиссия, GIZ фонди ҳамда Бирлашган Миллатлар Ташкилотининг Наркотик моддалар ва жиноят бошқармаси экспертлари қатнашишди.

Тадбир иштирокчилари бугунги кунда уюшган жиноятчиликка қарши курашишнинг асосий таркиби сифатида активларни қайтариш бўйича норасмий тармоқларнинг ўрни ва аҳамиятини эътироф этишиб, ушбу тармоқларнинг самарадорлигини янада ошириш, давлатларнинг активларни қайтариш соҳасидаги алоқаларининг муҳимлилиги, самарали ҳамкорликни амалга ошириш ва мавжуд муаммоларни биргаликда бартараф этиш мақсадида иштирок этувчи давлатлар доирасини кенгайтириш, асосий вазифа ва йўналишларни белгилаш, профессионал алоқаларни ўрнатиш ва уларни янада чуқурлаштириш, мазкур соҳадаги янги билим ва тажрибалар билан алмашиш каби масалаларни муҳокама қилишди.

Учрашув доирасида иштирокчиларга ARIN-WCA Котибияти номидан Бош прокуратура Академияси ходими томонидан ARIN-WCAнинг фаолияти, амалга оширилган ишлар ва келажакдаги истиқболли режалар юзасидан презентация қилинди. 

Активларни қайтариш бўйича норасмий тармоқларнинг (ARIN) котибиятлари ва раислик қилувчи давлатлари вакилларининг учрашуви информатив ва ишчан руҳда ўтказилиб, якунлари бўйича иштирокчилар томонидан келажакда муҳокама қилинадиган муҳим масалалар белгилаб олинди, фаол ҳамкорлик қилиш ва ARIN доирасида алоқаларни янада мустаҳкамлашга тайёр эканликлари билдирилди.