Тожикистон Республикаси Ҳукумати ҳузуридаги Ижро хизмати вакиллари делегацияси ташрифи

2019 йилнинг 3 декабрь куни Тожикистон Республикаси Ҳукумати ҳузуридаги Ижро хизмати бошлиғи И.М.Идрисзода бошчилигидаги делегация Ўзбекистон Республикаси Бош прокуратураси Академиясига ташриф буюрди.

Ташриф доирасида ташкил этилган ўқув семинарда Тожикистон Республикаси Ҳукумати ҳузуридаги Ижро хизмати вакиллари, Мажбурий ижро бюросининг марказий аппарат ходимлари, Бюронинг Тошкент шаҳар давлат ижрочилари ҳамда Академия профессор-ўқитувчилари иштирок этиб, тадбир давомида Тожикистон Республикасида ҳамда Ўзбекистон Республикасида суд ҳужжатларини мажбурий ижро этиш тизими ва соҳада амалга оширилаётган ислоҳотлар хусусида маълумотлар берилди.

Ташриф давомида меҳмонлар Бош прокуратура Академияси фаолиятининг асосий йўналишлари, замонавий ахборот-коммуникация технологиялари орқали масофавий таълимни жорий этган ҳолда, Мажбурий ижро бюроси ходимлари учун ташкил этилаётган ўқув жараёнлари, Академиянинг инфратузилмаси, шу жумладан мультимедиа маркази ва амалий имитацион машғулотларни амалга ошириш учун махсус хоналар билан яқиндан танишдилар.

Ташриф якунига кўра, томонлар ўзаро фойдали ҳамкорлик муносабатларини янада ривожлантириш ва мустаҳкамлашга тайёр эканликларини билдирдилар.