Бош прокуратура Академиясининг Қорақалпоғистон Республикаси ҳамда Хоразм вилоятида навбатдаги сайёр тадбирлари

Бош прокуратура Академияси томонидан Қорақалпоғистон Республикаси ва Хоразм вилояти прокуратура ва ички ишлар органлари фаолияти самарадорлигини ўрганиш, шунингдек, ҳуқуқбузарликлар профилактикаси, жиноятчиликка қарши курашиш ва жамоат хавфсизлигини таъминлаш соҳаларида амалий ёрдам кўрсатишга қаратилган навбатдаги сайёр тадбирлар ўтказилди.

Ўтказилган тадбирлар доирасида эксперт-таҳлил гуруҳлар аъзолари билан учрашувлар ўтказилиб, муаммоли масалалар муҳокама қилинди, эксперт-таҳлил гуруҳлари фаолиятида ахборот технологияларини қўллаган ҳолда ҳуқуқбузарликлар профилактикасини амалга оширишда прокуратура, ички ишлар органлари, фуқароларнинг ўзини-ўзи бошқариш органлари ва жамоат ташкилотларининг ҳамкорликни амалга ошириш методлари ишлаб чиқилди. Ҳар бир туманда содир этилган жиноятларнинг хусусиятлари, шунингдек, улар содир этилишининг асосий сабаблари таҳлил қилинди.

Бундан ташқари, тадбиркорлар ҳамда Савдо-саноат палаталари вакиллари учун тадбиркорлик соҳасида коррупцион ҳолатларнинг олдини олиш мақсадида яратилган “Бизнес сарбон” мобил иловасининг тақдимоти бўлиб ўтди, ушбу илова минтақаларда бизнесни қулай юритиш, тадбиркорлик фаолиятини ташкил этиш ҳамда кенгайтириш билан боғлиқ энг муҳим йўналишларда маълумот олишга мўлжалланган.

Шунингдек, Қорақалпоғистон Республикаси Спорт вазирлигининг тренер-ўқитувчилар таркиби билан очиқ мулоқот ўтказилиб, унда спортчилар ўртасида ҳуқуқбузарликларнинг олдини олиш, шунингдек, ўсиб келаётган ёш авлод ўртасида ҳуқуқбузарликлар, зўравонлик ва гиёҳванд моддалар истеъмол қилишнинг олдини олиш усули сифатида ёшларни спортга жалб қилиш, соғлом турмуш тарзини тарғиб қилиш бўйича ўқув-методик дастурларни кенгайтиришга бўлган эҳтиёж муҳокама қилинди. Асосий эътибор спортнинг куч ишлатиш билан боғлиқ ҳамда яккакураш турлари билан шуғулланувчи спортчилар томонидан зўравонлик содир этилишининг олдини олиш муаммоси ечимига қаратилди.