Бош прокуратура Академиясида БМТ Модели (MUN) ўтказилиши

Бош прокуратура Академиясида коррупцияга қарши курашиш ҳафталиги доирасида Академия магистратураси тингловчилари, Вестминстер университети ва Тошкент давлат юридик университети талабалари иштирокида илк маротаба Бирлашган Миллатлар Ташкилотининг Коррупцияга қарши конвенциясининг Иштирокчи-давлатларда имплементацияси масаласига бағишланган БМТ Модели – амалий ўйин белгиларини мужассам этган конференция ўтказилди.

Конференция очилиш маросимида Академия раҳбарияти ҳамда БМТнинг Наркотиклар ва жиноятчиликка қарши курашиш бошқармаси Марказий Осиё Минтақавий офиси вакиллари сўзга чиқишди.

БМТ Модели иштирокчилари имитациявий моделлаштириш йўли билан БМТнинг Коррупцияга қарши конвенцияси Иштирокчи-давлатлари делегатлари сифатида БМТнинг Жиноятчиликнинг олдини олиш ва одил судлов комиссияси (UN Crime Prevention and Criminal Justice Commission) йиғилишини ўтказишди ва унинг якуни бўйича тегишли резолюцияни ишлаб чиқиб, муҳокама қилишди.