Академия – бу магистрлар учун ўсиш нуқтаси Академия илк магистрларининг битирув маросими бўлиб ўтди

Ўзбекистон Республикаси Бош прокуратураси Академиясини 2019/2020 ўқув йилида “Прокурорлик фаолияти”, “Тергов фаолияти” ва “Коррупцияга қарши курашиш” мутахассисликлари бўйича битирган илк магистрларга диплом топшириш маросими бўлиб ўтди.

Тадбирда Академия раҳбарияти, профессор-ўқитувчилар, магистрлар ва уларнинг ота-оналари иштирок этдилар.

Тадбир давомида Академия магистратураси фаолияти ҳамда магистрлар ҳаётига оид эсдалик видеороликлари намойиш этилди.

Ўқув йили давомида магистратура бўлими ва магистрлар томонидан ўқув жараёни ҳамда магистрлар ижтимоий ҳаётини бойитиш мақсадида комплекс чора-тадбирлар амалга оширилди. Ўқув жараёнига кенг равишда давлат органлари, жамоатчилик вакиллари, миллий ва хорижий экспертлар жалб қилинди.

Академия бошлиғи Е.Коленко тадбирни очиб, магистратурада амалга оширилган ишлар ва қўлга киритилган ютуқлар хақида алоҳида тўхталиб ўтди. Шунингдек, Академия бошлиғи магистрларни кейинги шахсий ва профессионал ҳаётида муваффақиятлар тилаб, уларни Академияда ташкил этилган Бош прокуратура Академияси магистратураси битирувчилари ассоциацияси фаолиятида фаол иштирок этишга, Академия билан келгусидаги алоқаларни янада мустаҳкамлаб боришга чақирди.

“Касбга энди кириб келаётган магистрлар учун Академия прокурорлик касбига бўлган илк қадам, прокурорларимизга эса касбий ўсиш нуқтаси бўлиб хизмат қилади”, - деб таъкидлаб ўтди Е.В.Коленко.

Шунингдек, Академия профессори Б.Пўлатов сўзга чиқиб, ўз фикр ва мулоҳазаларини билдирди ҳамда магистрларга келажакдаги илмий ҳамда профессионал фаолиятида улкан муваффақиятлар тилади.

Магистрлар ва уларнинг ота-оналари Академия раҳбарияти, профессор-ўқитувчилари ва ходимларига миннатдорчилик билдириб, улар учун Академия қадрли ва ҳаётларида муҳим ўрин тутган илм даргоҳи бўлиб қолишини таъкидладилар.

Шундан сўнг магистрларга диплом ва эсдалик нишонлари топширилди.

Бош прокуратура Академияси жамоаси Академиянинг илк магистрларини табриклайди!