Бош прокуратура Академиясида БМТ Тараққиёт дастури мутахассиси билан учрашув бўлиб ўтди

2019 йил 14 декабрда Бош прокуратура Академиясида Халқаро коррупцияга қарши курашиш кунига бағишланган қатор тадбирлар доирасида БМТ Тараққиёт дастурининг Осиё-Тинч океани минтақасидаги тинч ва инклюзив жамиятлар учун (ACPIS) коррупцияга қарши глобал лойиҳаси эксперти Аида Арутюнова билан учрашув бўлиб ўтди.

Учрашув давомида хорижий экспертга Академиянинг давлат органлари ва ташкилотлари ходимларининг коррупцияга қарши курашиш соҳасидаги малакасини ошириш бўйича фаолияти, Академия Коррупцияга қарши курашиш илмий-таълим марказининг мақсадлари, вазифалари ва тадқиқотлари, Барқарор ривожланиш мақсадлари ютуқларини мувофиқлаштириш (16-мақсад бўйича) ҳамда коррупциявий жиноятлар учун жавобгарлик самарадорлигини ошириш мақсадида жиноят қонунчилигини такомиллаштириш тўғрисидаги маълумотлар етказилди.

Ўз ўрнида А.Арутюнова иштирокчиларга БМТ Тараққиёт дастурининг Осиё-Тинч океани минтақасидаги тинч ва инклюзив жамиятлар учун коррупцияга қарши глобал лойиҳасининг (ACPIS) фаолияти, 2019 йилда “Ўзбекистонда самарали, ҳисобдор ва очиқ бошқарув институтлари орқали коррупцияга қарши курашиш” қўшма лойиҳасининг амалга оширилиши тўғрисида тақдимот қилди.

Учрашувда ҳуқуқни муҳофаза қилиш идоралари учун ходимларни тайёрлаш ва қайта тайёрлаш, коррупцияга қарши курашиш борасида аҳолининг хабардорлигини ошириш, масофавий ўқитишнинг замонавий воситалари ва усулларини жорий этиш, шунингдек соғлиқни сақлаш, таълим, қурилиш, давлат харидлари каби соҳалардаги коррупция хавф-хатарларини аниқлаш бўйича коррупцияга қарши самарали механизмларни ишлаб чиқиш ва уларни барқарор ривожланиш миллий стратегияларида амалга ошириш мақсадида Академия ва БМТ Тараққиёт дастурининг ҳамкорлигини кенгайтириш масалалари муҳокама қилинди.

Шунингдек, А.Арутюнова “Коррупцияга қарши курашиш” йўналиши бўйича магистратура тингловчилари учун “Глобал ривожланиш кун тартиби контекстида коррупцияга қарши курашиш–2030 ” мавзусида мастер-класс ўтказиб, унда тадбир иштирокчиларига БМТнинг Коррупцияга қарши конвенциясининг асосий талаблари ва уни амалга ошириш механизмлари, 2030 йилгача Барқарор ривожланиш мақсадлари, турли мамлакатларда хусусий секторда “комплаенс назорат”нинг коррупцияга қарши тизимларини жорий қилиш жараёнлари, коррупциявий ҳуқуқбузарликларининг олдини олиш бўйича энг яхши хорижий тажрибалар ва бошқалар ҳақида маълумот берди. 

Иштирокчилар эътиборига БМТ Тараққиёт дастури ва бошқа халқаро ташкилотларнинг коррупцияга қарши курашиш соҳасидаги Ўқув хаблари тўғрисида маълумот етказилди.