Департаментнинг туман (шаҳар) бўлимлари бошлиқлари учун ўқув курслари ўтказилди

2019 йил 1-13 июль кунлари Бош прокуратура Академиясида Иқтисодий жиноятларга қарши курашиш департаментининг туман (шаҳар) бўлимлари бошлиқлари учун ўқув курслари ўтказилди.

Ўқув курслари дастури асосида тингловчиларда Департамент органлари фаолиятини ташкил этиш, иш фаолиятини ташкил этишда комплекс ва тизимли таҳлил, психологик барқарорликни таъминлаш, иқтисодий жиноятлар ва коррупцион қилмишларни фош этиш, жиноий фаолиятдан олинган даромадларни легаллаштириш, шунингдек ахборот-коммуникация технологияларидан фойдаланиб содир этилаётган иқтисодий жиноятларга қарши курашишнинг назарий ва амалий кўникмалари шакллантирилди.

Ўқув машғулотлари доирасида тинговчилар Департаментнинг Тошкент шаҳар бошқармаси ҳамда Юнусобод тумани бўлими фаолияти билан яқиндан танишдилар.

Ўқув курслари машғулотларини ўтказишга Академия профессор-ўқитувчилари билан бир қаторда Бош прокуратура, Департамент, Ҳисоб палатаси, Ички ишлар вазирлиги Академияси тажрибали ходимлари ҳамда хорижий экспертлар жалб қилинди.

Ўқув машғулотлари интерактив шаклда ўтказилди, тингловчилар ўз фаолиятлари билан боғлиқ долзарб масала ва муаммоларни муҳокама қилиб, уларнинг ечимига оид ўзаро тажриба алмашишди.