Академик мобиллик дастурларини амалга ошириш

Академик мобилликни ривожлантириш Академиянинг интеллектуал капиталини ва таълим сифатини юксалтириш, ҳамкор ташкилотлар билан халқаро ҳамкорликни ривожлантиришга қаратилган Академия ўқув ва илмий фаолиятининг муҳим таркибий қисми ҳисобланади.

Хорижий давлатларнинг ўқув ва илмий-тадқиқот муассасалари билан самарали ҳамкорликни кучайтириш мақсадида Академия докторанти А.Джураева Латвия Республикаси Ташқи ишлар вазирлиги ҳамда Швейцария ва АҚШ ҳукуматлари кўмагида Рига Олий ҳуқуқ мактабида европа ҳуқуқи бўйича олти ҳафталик интенсив ўқув курсида иштирок этиб қайтди.

Давлат хизматчилари, нодавлат ташкилотлар ва илмий-тадқиқот муассасалари вакиллари (PhD тадқиқотчилари) учун мўлжалланган мазкур ўқув дастури европа ҳуқуқи, иқтисодиёти ва сиёсати бўйича сифатли халқаро академик таълим беришга йўналтирилган.

Курс дастури европа ҳуқуқи ва интеграциялашув, лойиҳа бошқаруви, барқарор тараққиёт миллий сиёсатини ишлаб чиқиш, инсон ҳуқуқлари, Европа иқтисодий сиёсати принциплари бўйича 6 та модулдан иборат учта асосий ўқув блокидан иборат бўлди.

Ўқиш давомида Европа комиссияси раиси ўринбосари ҳамда Европада ижтимоий мулоқот масалалари бўйича Европа комиссари билан учрашувлар ташкил этилди.

Ўқув дастурида, шунингдек Европа парламенти, Европа комиссияси, Европа Ташқи алоқалар хизмати, Европа Иттифоқи Суди, Европа аудиторлар суди ва Европа Иттифоқининг бошқа муассасалари фаолияти билан танишиш учун Брюссель ва Люксембург шаҳарларига бир ҳафталик ўқув саёҳати назарда тутилган.

Дастур якунида иштирокчиларга курсни муваффақиятли тамомлаганлик ҳақида халқаро сертификатлар топширилди.