Хорижлик эксперт Анна Гуардинонинг Бош прокуратура Академиясида олиб борган фаолияти ниҳоясига етди

Прокуратура органлари олдига қўйилган вазифаларни илғор хорижий тажрибани қўллаган ҳолда самарали амалга ошириш мақсадида Бош прокуратура Академияси ўқув жараёнига ҳуқуқшунос кадрларни тайёрлаш ва юриспруденция соҳасидаги етакчи хорижий экспертлар жалб қилиб келинмоқда.

2019 йил 12 июль куни илгари АҚШнинг Жоржия штати округ прокурори ёрдамчиси лавозимида ишлаган Анна Гуардинонинг “Regional dialogue” ХННТ билан ҳамкорлик доирасида Академияда олиб борган бир йиллик фаолияти якунларига бағишланган тадбир бўлиб ўтди.

А.Гуардино Академия илмий салоҳиятининг мустаҳкамланишига ҳисса қўшди. А.Гуардино иштирокида ҳуқуқий муаммолар муҳокамасига бағишланган Law Talks муҳокама клуби мунтазам равишда ташкил этиб келинди. Ҳамкорликнинг мазкур шакли Академия ходимларида прокурор-тергов фаолиятини ҳамда қонунлар ижроси устидан назоратни амалга ошириш, жиноятчиликнинг олдини олиш борасида АҚШ ва Ўзбекистон тажрибасининг қиёсий таҳлили асосида инглиз тилида равон сўзлашиш ҳамда таҳлилий ва танқидий фикрлаш кўникмаларини шакллантиришга хизмат қилди.

Шунингдек, эксперт томонидан “Жабрланувчилар ва гувоҳларга ёрдам кўрсатиш хизматини ташкил қилиш дастури” лойиҳаси ишлаб чиқилди. Мазкур дастур пойтахтнинг Чилонзор туманида амалга оширилиши назарда тутилган.

Самарали ҳамкорлик ва Академия илмий салоҳиятини оширишга қўшган ҳиссаси учун А.Гуардинога Академия раҳбарияти ва профессор-ўқитувчилари томонидан миннатдорчилик билдирилди. Томонлар ўзаро ҳамкорликни онлайн шаклда масофадан туриб давом эттиришга келишиб олишди.