Лунд университети билан ҳамкорликнинг мустаҳкамланиши

Жорий йилнинг 16 июль куни Академияга Лунд университети Ҳуқуқ социологияси департаменти профессори, Иқтисодий хавфсизлик институти (Швеция) директори Монс Свенссоннинг ишчи ташрифи бўлиб ўтди.

Ташрифдан кўзланган мақсад ҳамкорликдаги лойиҳаларни муҳокама қилиш ва томонлар ўртасидаги ўзаро ҳамкорликни янада мустаҳкамлаш бўлди.

Академия раҳбарияти ва ходимлари билан учрашув чоғида келгусида ҳамкорликдаги лойиҳаларни амалга ошириш масалалари муҳокама қилинди.

Ўзаро ҳамкорликдаги фаолият натижаси сифатида, бошқа таълим ва тадқиқот муассасалари билан бир қаторда, Академия Европа Комиссияси Marie Sklodowska-Curie Research and Innovation Staff Exchange дастурининг ҳуқуқий маданият ва инвестициявий муҳит ўртасидаги ўзаро алоқасини тадқиқ этиш бўйича “Марказий Осиё ҳуқуқи: Марказий Осиёдаги ҳуқуқий маданиятлар” ҳамда Erasmus+ International Credit Mobility дастурининг коррупциянинг олдини олиш борасидаги грантлари ғолиби бўлганлиги алоҳида таъкидланди.

Ташриф чоғида М.Свенссон Ўзбекистонда коррупциянинг олдини олиш борасидаги ишлар билан танишиб, Швециянинг бу соҳадаги ижобий тажрибасини намойиш қилди.

Хусусан, М.Свенссон, Ўзбекистон Республикаси Президентининг “Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида”ги Фармони ижросини таъминлаш мақсадида ташкил этилган “Олий таълимда коррупциясиз соҳа” лойиҳасини тайёрлаш бўйича ишчи гуруҳи фаолияти билан танишиб, ушбу лойиҳада эксперт сифатида иштирок этишга тайёр эканлигини билдирди.

М.Свенссон “Коррупцияни талқин қилишда ҳуқуқий плюрализм” лойиҳаси доирасида Ўзбекистонда олий таълим соҳасида коррупцияга қарши курашиш бўйича алоҳида тадқиқотни амалга ошириш имконияти борлигини таъкидлаб, ушбу тадқиқотда Бош прокуратура Академиясини ҳамкор сифатида иштирок этишга таклиф қилди.

 Ташриф якунида томонлар икки томонлама ҳамкорликни янада мустаҳкамлашга тайёр эканликларини билдирдилар.