Ҳуқуқни муҳофаза қилувчи органлар ходимлари учун халқаро экспертлар иштирокида семинар-тренинг ташкил этилди

Бош прокуратура Академиясида жорий йилнинг 15-19 июль кунлари Буюк Британия ва Шимолий Ирландия Бирлашган Қироллигининг Жиноятчиликка қарши курашиш миллий агентлиги томонидан “Оператив маълумотларнинг стратегик таҳлили” мавзусида 5 кунлик семинар-тренинг ўтказилди.

Семинар Буюк Британиялик экспертлар — Джон Блейк ва Надия Туоминен томонидан олиб борилди. Унда Бош прокуратура, Бош прокуратура ҳузуридаги Иқтисодий жиноятларга қарши курашиш департаменти, Ички ишлар вазирлиги, Давлат хавфсизлик хизмати, Давлат божхона қўмитаси, Миллий гвардия ва Бош прокуратура Академияси вакиллари иштирок этди.

Тадбирда қарор қабул қилиш ва стратегияларни ишлаб чиқишда оператив маълумотларнинг аҳамияти, ахборот цикллари, турли ахборот манбалари билан ишлаш, ҳуқуқни муҳофаза қилиш фаолиятида стратегик таҳлилнинг ўрни, таҳлилни амалга ошириш усуллари, нохолислик (бир ёқламалик) ва унинг олдини олиш усуллари ҳамда аниқланган хавф ва таҳдидларни бошқариш стратегияси масалалари кўриб чиқилди.

 Интерактив шаклда олиб борилган дарслар иштирокчиларга ҳар бир мавзу бўйича олган билим ва кўникмаларини амалий топшириқлар ёрдамида мустаҳкамлаш имконини берди. Тренинг якунлари бўйича иштирокчиларга сертификатлар топширилди.