Ногиронлиги бўлган шахсларнинг ҳуқуқларини ҳимоя қилиш бўйича тадбирда иштирок этилди

Академия ходимлари ва раҳбарияти “Эл-юрт умиди” жамғармаси таклифига асосан ногиронлиги бўлган шахсларнинг ҳуқуқларини ҳимоя қилишда АҚШ тажрибасидан фойдаланиш масалаларига бағишланган видеоконференцияда иштирок этди.

Мазкур тадбир “Эл-юрт умиди” жамғармаси томонидан Сиракьюз университети (АҚШ) билан ҳамкорликда ташкил этилган бўлиб, иштирокчилар университетнинг ногиронлиги бўлган шахсларнинг ҳуқуқларини ҳимоя қилиш бўйича юридик клиникаси фаолияти билан танишди.

Вебинарда “Эл-юрт умиди” жамғармаси директори А.Бекмуродов, Сиракьюз университети ногиронлар ҳуқуқлари клиникаси директори М.Шварц, мазкур университет тадқиқотчиси М.Турдиев, илмий ва таълим муассасалари ҳамда жамоат бирлашмалари вакиллари иштирок этди.

Тадбирда Академия бошлиғи Е.Коленко ногиронлиги бўлган шахслар ҳуқуқларини ҳимоя қилишнинг ҳуқуқий асослари, институционал механизмларини такомиллаштириш ва халқаро нормаларни имплементация қилиш бўйича республикамизда амалга оширилаётган чора-тадбирлар, шунингдек аҳолининг заиф қатламларига ҳуқуқий ёрдам кўрсатиш имкониятини кенгайтиришга қаратилган клиник таълимни жорий этиш бўйича Академия тажрибасини қайд этиб ўтди.

Тадбир иштирокчилари ихтисослаштирилган клиник таълим соҳасида ҳамкорлик қилиш ва ўқитувчилар малакасини ошириш, шунингдек кўриб чиқилган масалалар юзасидан ўзаро ахборот ва методик ҳамкорлик қилишга тайёр эканликларини билдирдилар.