Бош прокуратура Академиясига Вьетнам делегациясининг ташрифи

Вьетнам Социалистик Республикаси Мудофаа вазирлиги ҳузуридаги Марказий-ҳарбий прокуратура делегациясининг 22-27 июль кунларидаги ташрифи доирасида Халқ прокурори ўринбосари – Вьетнам Марказий-ҳарбий прокурори Нгуен Ван Хань Ўзбекистонда прокуратура органлари кадрларини тайёрлаш, қайта тайёрлаш ва малакасини ошириш тизими билан танишиш мақсадида Бош прокуратура Академиясига ташриф буюрди.

Делегация аъзолари Академиянинг илмий ва ўқув салоҳияти, замонавий ахборот-коммуникация технологияларини жорий этиш, масофавий ўқитиш, прокуратура органлари фаолиятини психологик таъминлаш, ҳуқуқбузарликлар профилактикаси ва жиноятчиликнинг олдини олиш бўйича амалга оширилаётган фаолияти билан танишди.

Ташриф якунида делегация томонидан Вьетнам Социалистик Республикаси Мудофаа вазирлиги ҳузуридаги Марказий-ҳарбий прокуратура вакилларини Бош прокуратура Академиясида ўқитиш имкониятларини кўриб чиқиш таклифи билдирилди.