Бош прокуратура Академияси ходимлари “Эл-юрт умиди” танлови ғолиблигини қўлга киритдилар

Юртимизда олиб борилаётган ислоҳотларни жадал амалга оширилиши жараёнида замонавий билим ва малакага эга кадрларга бўлган талаб кучаймоқда.

Шу муносабат билан, Ўзбекистон Республикаси Бош прокуратураси Академиясида кадрлар салоҳиятини ошириш, Академияда илғор ҳалқаро тажрибани жорий этиш мақсадида тизимли чора-тадбирлар олиб борилмоқда.

Бош прокуратура Академиясининг бир гуруҳ ходимлари Ўзбекистон Республикаси Вазирлар Маҳкамаси ҳузуридаги  “Эл-юрт умиди” жамғармаси томонидан вазирликлар ва идоралар, маҳаллий давлат бошқаруви органлари мутахассис-кадрларини хорижда ўқитиш учун ташкил этилган иккинчи стипендия танловида ғолиб деб топилдилар.

Ғолиблар дунёнинг етакчи университетлари ва илмий-амалий тадқиқот марказларида малака ошириш имкониятига эга бўлдилар.

Жумладан, Суд ҳужжатлари ва бошқа органлар ҳужжатларини мажбурий ижро этиш кафедраси ўқитувчиси Аброр Акбутаев Францияда трансмиллий жиноятларга қарши курашиш соҳасида малака ошириш дастурида иштирок этади.

Тил ўргатиш кафедраси бошлиғи Светлана Курбанова Буюк Британияда юридик инглиз тилини ўқитиш йўналиши бўйича малака ошириш дастурида қатнашади.

Иқтисодий жиноятларга ва жиноий даромадларни легаллаштиришга қарши курашишни ташкил этиш кафедраси катта ўқитувчиси Бобур Турдиев иқтисодий жиноятларга қарши курашиш соҳасида Канаданинг Полиция коллежида малака ошириш дастурида иштирок этади.

Ушбу дастурларда иштирок этиш прокуратура органлари ходимларини ўқитишда қонун устуворлигини таъминлаш, қонунга бўйсуниш, фуқароларнинг эркинликлари ва қонуний манфаатларини ҳимоя қилиш борасидаги қўйилган вазифаларни самарали амалга ошириш учун зарур бўлган билим ва кўникмаларни шакллантириб, Академиянинг ўқув ва илмий салоҳиятини ошириш йўлида хизмат қилади.