Ўзбекистон Республикаси Жиноят-ижроия кодексини такомиллаштириш масалалари

Жорий йилнинг 26 июлида Жиноят-ижроия қонунчилигини такомиллаштириш бўйича Идоралараро эксперт гуруҳи ва Бош прокуратура Академияси билан ҳамкорликда ҳамда БМТнинг Наркотик моддалар ва жиноят бошқармаси кўмаги асосида хорижий экспертлари иштирокида “Ўзбекистон Республикаси Жиноят-ижроия кодексини такомиллаштириш масалалари” мавзусида давра суҳбати ташкил этилди.

Тадбирда Бош прокуратура, Олий суд, Бош прокуратура ҳузуридаги Мажбурий ижро бюроси, Ички ишлар вазирлиги ходимлари шунингдек, Бош прокуратура Академияси, Судьялар олий кенгаши ҳузуридаги Судьялар олий мактаби, Ички ишлар вазирлиги Академияси, Тошкент давлат юридик университети вакиллари иштирок этишди.

Давра суҳбати давомида пенитенциар тизими соҳасидаги халқаро стандартлар ва нормаларни инобатга олган ҳолда Ўзбекистон Республикаси жиноят-ижроия қонунчилигини такомиллаштиришнинг асосий йўналишлари ҳамда озодликдан маҳрум қилиш билан боғлиқ бўлмаган жазоларни ижро этиш механизмларини тубдан қайта кўриб чиқиш масалалари муҳокама этилди.

Тадбир якунида умумэътироф этилган халқаро стандартларга мос равишда маҳкумлар ҳуқуқлари доирасини янада кенгайтириш ва жазони ижро этиш муассасалари фаолияти устидан жамоатчилик назоратини кучайтириш, уларнинг озодликдан маҳрум этиш жойлардан озод этилган шахсларни ижтимоий мослаштиришда фуқаролик жамияти институтлари билан узвий ҳамкорлигини таъминлаш жиноий жазоларнинг ижросини таъминлаш соҳасидаги норматив-ҳуқуқий базани янада такомиллаштиришнинг устувор йўналишлари ҳисобланиши таъкидланди.